„Mikill er máttur Fésbókar“

„Mikill er máttur Fésbókar. Í gær póstaði ég lýsingu á líkamsárás sem ég varð vitni að í von um að þau skilaboð bærust til þolanda að hún hefði bandamann - vildi hún kæra.“ segir Birgir Örn Steinarsson, tónlistarmaður, í nýrri stöðuuppfærslu á Facebook.

Vísir greindi frá annarri stöðuuppfærslu Birgis í gær þar sem hann segir frá hrottalegri líkamsárás sem hann varð vitni að.

„Það var haft samband við mig og ég veit nú hverjir áttu í hlut, nöfn þeirra, aldur og það ástand sem þau búa við.“ segir Birgir í stöðuuppfærslunni.

„Það er ykkur að þakka að nú séu skilaboðin komin til hennar. Þau rötuðu á réttan stað.“ segir Birgir sem endar stöðuuppfærsluna á heimspekilegri hugmynd um samfélagsmiðilinn.

„Kannski er mesti lærdómur gærdagsins að í gegnum Fésbókina getum við öll passað upp á hvort annað, látið vita að okkur sé ekki sama þegar við sjáum svona - og að við sættum okkur ekki við slíkt. Við getum hjálpast að við að koma slíkum skilaboðum áleiðis. Fésbókin er samfélagsmiðill og við erum samfélagið. Notum hana vel.“