Árni - þú ert velkominn í lýðveldisbygginguna

Síðastliðinn laugardag flutti Árni Páll Árnason, alþingismaður og formaður Samfylkingarinnar, ræðu á flokksráðsfundi fylkingarinnar. Ræðan einkenndist af bölmóð og reiði. Tilgangur ræðunnar var vafalaust sá, að auka á vantrú almennings á íslensku samfélagi, sem að mati Árna er bersýnilega á leið til glötunar. Árni kennir núverandi ríkisstjórn um þessa vondu stöðu, enda virtist hann hafa færst í aukana er hann mætti í sjónvarpssal daginn eftir og fullyrti að ríkisstjórninni væri ætlað að gera grundvallarbreytingar á samfélaginu – öllum til ills.

Svo er auðvitað ekki, en því er ekki að neita að verkefni líðandi stundar eru erfið – og það er ekkert gamanmál að takast á við mörg þeirra. Þótt Árni sé reiður, þá er hann ekki þess umkominn að benda á neinar lausnir eða setja fram uppbyggilega gagnrýni. Þess í stað leikur formaðurinn sér að háfleygum orðum og býður samlanda sína velkomna til lýðveldisbyggingar (sem væntanlega er reist fyrir lánsfé) en þar eiga menn samkvæmt hugmyndum Árna að ræða málin og koma með lausnir.

Á sama tíma og Árni kvartar sáran undan því að útgjöld ríkisins séu ekki hærri en raun ber vitni þá talar hann um ábyrgðarleysi í ríkisfjármálum. Það felst mikil ábyrgð í því að reka ríkissjóð, sameiginlegri buddu þjóðarinnar. Nú hefur tekist að snúa við hallarekstri ríkisins, skuldasöfnun ríkisins hefur verið stöðvuð og annað árið í röð verður heildarjöfnuður ríkisins jákvæður. Til þess þurfti engar töfralausnir, engar skattahækkanir eða ný lán heldur einungis þann hugsunarhátt að heildarútgjöld séu ekki hærri en heildartekjur. Þetta er mjög mikilvægt atriði og í raun forsenda þess að hægt sé t.d. að byggja nýjan spítala eða semja um hækkun á launum lækna án þess að ráðstafa fjármunum framtíðarinnar með dýrum lánum. Þetta er eitthvað sem Árni kýs að hundsa.

Í fjárlagafrumvarpi næsta árs er mælt fyrir breytingum á virðisaukaskattskerfinu. Frumvarp sem hefur það að markmiði að einfalda skattkerfið, afnema úreld vörugjöld og þar með auka ráðstöfunartekjur almennings um 0,5%. Formaður Samfylkingarinnar telur þetta ekki gott verkefni og afvegaleiðir umræðuna með því að einblína á einn vöruflokk í staðin fyrir að horfa heildrænt á málið. Hann hefur fengið til liðs við sig formenn ASÍ og VR og saman kallar hópurinn einróma að frumvarpið sé aðför að heimilum landsins. Þetta er óábyrgur málflutningur og skrýtið að litið sé á aukningu ráðstöfunartekna sem aðför að heimilum.

Í lýðveldisbyggingu Árna ræða menn lausnir, aðgerðir og framfarir. Ef ég les rétt í orð Árna þá þurfa þeir sem sitja við langborð lýðveldisbyggingarinnar að beina kröftum í góðan farveg og bjóða fram einhverja valkosti í verkefnunum framundan. Það er ósk mín að  Árni sýni þá mannasiði í lýðveldisbyggingunni sem hann krefst af öðrum gestum hennar.