Lögreglan telur íkveikjur á Akureyri ekki tengdar

Lögreglan á Akureyri telur tvær íkveikjur á Akureyri yfir páskahátíðina ekki tengdar. Lögreglan staðfestir að stúlka á átjánda ári hafi viðurkennt að hafa gert tilraun til að kveikja í Verkmenntaskólanum á Akureyri.

Á fimmtudagskvöld var kveikt í hurð Akureyrarkirkju. Það mál er enn óupplýst.

Að sögn lögreglunnar á Akureyri telst þetta óvanalega stuttur tími á milli ívekikja, en þær virðist samt sem áður ekki vera tengjast. „Við sjáum enga tengingu á milli þessara tveggja mála – þetta virðist vera tilviljun að tvær íkveikjur séu með svona stuttu millibili,“ segir Daníel Guðjónsson yfirlögregluþjónn á Akureyri.

Í báðum íkvekjunum var eldfimur vökvi notaður til að magna eldinn.

Slökkvilið kallað til i tæka tíð

 Íkveikjan í nótt telst upplýst en þá mun stúlka á átjánda ári hafa borið eld að húsnæði VMA. Lögreglan vildi ekki tjá sig um af hverju grunur beindist strax að stúlkunni, sem viðurkenndi verknaðinn í nótt.

Lögreglu og slökkviliði barst tilkynning um málið í tæka tíð þannig að eldurinn var slökktur án þess að umtalsvert tjón hlytist af.

Skólahald er með eðlilegum hætti í VMA í dag – þrátt fyrir íkveikjuna.

Á erfitt með að setja sig í spor brennuvargs

„Ég á mjög erfitt með að setja mig í spor þeirra sem gerðu þetta,“ sagði  Svavar Alfreð Jónsson, sóknarprestur Akureyrarkirkju í samtali við Vísi á föstudaginn um íkveikjuna í Akureyrarkirkju. „Þetta er allavega ekki fólk sem líður vel," bætti hann við.

Kveikt var í kirkjuhurðinni; stórri eikarhurð, og sagði Svavar tjónið vera mikið. „Það kæmi mér ekki á óvart ef það væri ekki hægt að gera við hana, hún er það illa brunnin.

Hann benti á að verknaðinn hafi þurft að skipuleggja vel fram í tímann og sagði þetta árás á kirkjuna sjálfa.