Tæp 300 þúsund safnast vegna „nomakeupselfie“ áskorunarinnar

„Þegar ég fór að skoða þessar umræður og velta því fyrir hverju það hefði breytt að fyrir baráttuna við krabbamein, að ég hefði sett einhverja mynd af mér ómálaðri í morgunsárið á Facebook, vildi ég leggja mitt af mörkum,“ segir Ragnhildur Þórðardóttir, sálfræðingur og einkaþjálfi.

Ragnhildur sem er einnig þekkt sem Ragga nagli er ein af fjölmörgum sem settu mynd af sér á Facebook án farða. „Ég áttaði mig á að tilgangurinn með þessar mynd var eiginlega enginn,“ segir hún.  Ragga birti nýja mynda af sér á Facebook–síðu sinni, sem hún heldur út með leiðbeiningum fyrir fólk um heilbrigðan lífstíl, í gær.  Myndina kallar hún „full make up selfie“.

Áskorun fyrir konur að birta myndir af sér án farða hefur gengið á samskiptamiðlum. Í Bretlandi gekk áskorunin út á að safna pening en hér á landi var engin slík söfnun í gangi.

„Maður veltir því fyrir sér hvernig í ósköpunum þessar myndbirtingar eigi að koma að gagni í baráttunni gegn krabbameini,“ sagði Berglind Guðmundsdóttir í samtali við Vísi á þriðjudag. Berglind hefur staðið í baráttunni við krabbamein í sex ár.

Frá Krabbameinsfélagi Íslands fengust þær upplýsingar á þriðjudag að enginn hefði haft samband við félagið vegna áskorunarinnar né hefðu neinir peningar safnast. Hér á landi virtist því sem  birting ómálaðra sjálfsmynda væri  frekar til almenns stuðnings en fjárhagslegs.

Féð meðal annars nýtt til rannsókna og fræðslu

„Upp úr hádegi á þriðjudag fór fólk að hafa samband við okkur og biðja um upplýsingar um hvernig hægt væri að styrkja verkefni Krabbameinsfélagsins,“ segir Ólöf María Jóhannsdóttir, á markaðsdeild Krabbameinsfélags Íslands.

„275 þúsund krónur hafa verið lagaðar inn síðan þá og við tengjum það við „selfies“ áskorunina. Við erum afar þakklát öllum sem hafa lagt okkur lið og vilja styðja okkur,“ segir Ólöf.

Því fé sem safnast er nýtt til rannsókna, fræðslu, forvarna og ráðgjafar við krabbameinssjúklinga og aðstandendur þeirra.

Hér eru upplýsingar fyrir þá sem hafa áhuga á að styrkja Krabbameinsfélagið. 

Velti tilgangsleysi myndbirtinganna fyrir sér

„Strákarnir eru með mottumars þar sem heitið er á þá sem safna skeggi og birta af sér myndir. Hér á landi eru auðvitað safnanir fyrir brjóstakrabbamein, til dæmis Bleika slaufan,“ segir Ragga.

„En þegar þetta var komið á stað með sjálfsmyndirnar og þjónaði einhvern veginn engum tilgangi fór ég að velta þessu fyrir mér. Ég sá líka að margir hugsuðu eins og ég og ákváðu að leggja Krabbameinsfélaginu lið.“