„Ég slapp því ég er stór og þungur en konan var ákærð því hún er léttari"

„Við vorum alveg jafn brotleg, munurinn var bara sá að lögreglumennirnir gáfust upp að bera mig inn í bíl því ég er stór og þungur,“ segir Lárus Vilhjálmsson um ástæður þess að kona hans, Ragnhildur Jónsdóttir, var ákærð í Gálgahrauns-málinu svokallaða en ekki hann.

Þau hjónin voru bæði handtekin þann 21. október síðastliðinn fyrir að ólhýðnast lögreglu þegar þau mótmæltu lagningu nýs Álftanesvegar gegnum Gálgahraun og Garðahraun.

Þegar ákæra í málinu var birt, í desember í fyrra, vakti það mikla athygli hjónanna að aðeins Ragnhildur fékk ákæru – en Lárus slapp. Ástæðan, að mati þeirra, er einföld.

„Ég slapp útaf því að ég er stór og þungur en konan var kærð því hún er léttari. Lögreglumennirnir gáfust upp við að bera mig inn í lögreglubíl og aðeins þeir sem voru settir inn í lögreglubílinn fengu ákæru. Við vorum alveg jafn brotleg. Við vorum tekin á sama stað og höguðum okkur nákvæmlega eins. Eini munurinn er stærðin á okkur,“ útskýrir Lárus.



Vísir hefur rætt við fleiri sem voru viðstaddir þennan atburð sem staðfesta þessa frásögn Lárusar.

Ekki náðist í aðila innan lögreglunnar sem vill tjá sig um málið.

Krafa um frávísun

Alls voru níu manns ákærðir fyrir að hlýða ekki fyrirmælum lögreglu. Enn liggur frávísunarkrafa þeirra fyrir dómi. 

„Upphaflega fengum við sent sektarboð vegna handtökunnar. En við tókum þann pól í hæðina að svara því ekki, enda fannst okkur við vera í rétti og við hefðum ekki gerst brotleg,“ segir Lárus.

Hann segir að um tuttugu fimm manns hafi fengið sektarboðið.

Var í hrauninu sem barn

Lárus var handtekinn tvisvar sama daginn og því vekur það enn frekari athygli hans, að eiginkona hans hafi verið ákærð en hann sloppið. Hún var eingöngu handtekinn einu sinni.

Lárus segist hafa viljað vernda Gálgahraun og Garðahraun fyrir börn sín og barnabörn. „Ég ólst upp í Norðurbænum svokallaða í Hafnarfirði. Ég lék mér mikið í þessu hrauni sem barn. Okkur hjónunum langar að vernda þetta landsvæði svo kynslóðir framtíðarinnar geti líka notið þess.“