Stórt skref afturábak

Stjórnsýslufræðingur, sem gerði úttekt á starfi Þróunarsamvinnustofnunar árið 2008, segir tillögur Gunnars Braga Sveinssonar, utanríkisráðherra, um að leggja stofnunina niður í núverandi mynd, stórt skref afturábak.

Gunnar Bragi tilkynnti í vikunni að hann hefði ákveðið að leggja niður Þróunarsamvinnustofnun og færa hana undir Utanríkisráðuneytið. Segir hann að það sé til að bæta þróunarsamvinnu.

Í fréttum RÚV fyrr í vikunni sagði Gunnar Bragi að allar skýrslur sem gerðar hafa verið um hvernig best sé að halda á þróunarsamvinnu, hefðu komist að þeirri niðurstöðu að rétt væri að sameina starfsemina inn í ráðuneytin.  

Sú fullyrðing stangast þó á við athugun stjórnsýslufræðingsins Sigurbjargar Sigurbjörnsdóttur á Þróunarsamvinnustofnun sem gerð var árið 2008 að beiðni þáverandi utanríkisráðherra, Ingibjargar Sólrúnar Gísladóttur. Þar var eindregið lagst gegn því að stafsemin yrði felld inn í ráðuneytið.

Gunnar Bragi byggir ákvörðun sína á meiginniðurstöðu skýrslu Þóris Guðmundssonar um fyrirkomulag þróunarsamvinnu sem birt var í sumar. Starfsmenn Þróunarsamvinnustofnunar gerðu alvarlegar athugasemdir við skýrsluna og sögðu tillögurnar ótímabærar, ólíklegar til að bæta árangur og að óljóst sé hvaða markmiðum þær eigi að ná.