Stal á fjórða tug flaskna af sterku áfengi, raftækjum og sælgæti

Hæstiréttur þyngdi í dag fangelsisdóm yfir karlmanni fyrir ítrekaðan þjófnað úr átta mánuðum í tíu mánuði. Dómurinn er óskilorðsbundinn.

Málið var dómtekið í Héraðsdómi Norðurlands Eystra í maí 2013 og var ákæran í tveimur liðum. Annars vegar fyrir að hafa stolið á fjórða tug flaskna af sterku áfengi auk flaskna af bjór og léttara áfengi aðfaranótt 9. október 2012.

Hins vegar fyrir að hafa sömu nótt brotist inn í verslun og stolið þaðan myndavél, rafmagnsrakvél, borðsíma, þremur farsímum, borasetti, vinnuvettlingum, tveimur kartonum af sígarettum auk gosdrykkja og súkkulaðistykkja. Var maðurinn í slagtogi við annan mann í því ráni. Hlaut sá sex mánaða fangelsi í héraði.

Sakavottorð mannsins nær aftur til ársins 1996 þegar hann var dæmdur fyrir auðgunarbrot. Síðan þá hefur hann verið dæmdur tólf sinnum fyrir slík brot, síðast í júlí 2009. Með hliðsjón af löngum sakaferli mannsins var hann dæmdur í tíu mánaða fangelsi.

Dóminn í heild sinni má nálgast á vef Hæstaréttar.