Dæmdur í fimm ára fangelsi fyrir nauðgun og frelsissviptingu

Hæstiréttur staðfesti í dag dóm héraðsdóms í máli Wojchiech Marchin Sadowski sem dæmdur var í fimm ára fangelsi fyrir að hafa nauðgað ástralskri konu í apríl á síðasta ári. Þá er honum gert að greiða konunni 3.176.114 krónur í skaðabætur. Sadowski, sem er tuttugu og fimm ára, áfrýjaði dómnum til Hæstaréttar í nóvember í fyrra, en krafðist ákæruvaldið þyngri refsingar í málinu.

Sadowski var ákærður fyrir að hafa haldið ástralskri konu nauðugri í iðnaðarhúsnæði í 30 til 40 mínútur, beitt hana ofbeldi og ekki hleypt henni út þrátt fyrir að hún bæði hann um það. Þá var hann einnig ákærður fyrir að hafa, á meðan frelsissviptinginunni stóð, krafið hana um kynlíf, ítrekað slegið og sparkað í höfuð hennar og líkama, þröngvað hana til munnmaka og haldið áfram árás sinni eftir það.

Sadowski hitti konuna í miðbæ Reykjavíkur að kvöldi í apríl fyrir tæpu ári. Varð konan viðskila við tvo vini sína í miðborginni og bauð Sadowski henni far.

Beit í getnaðarlim mannsins

Konan sagðist muna næst eftir sér þegar hún vaknaði í húsnæði sem líktist vöruskemmu sem verið væri að gera upp að því er segir í dómnum. Hún hafi haft áhyggjur af því að hún myndi missa af flugi sínu en komist að því að húsnæðið væri læst. Hún kvaðst hafa vitað að Sadowski hygðist nauðga henni og sagði hann hafa þvingað sig með ofbeldi til munnmaka. Hún hafi því gripið á það ráð að bíta í getnaðarlim hans.  Eftir það hafi hann veist að henni með frekara ofbeldi, hann hafi sparkað í hana og kýlt og blæddi henni mikið á vettvangi.

Barðist af öllum mætti

Hún segir Sadowski hafa sagt „yes, yes, sex, sex“ og reynt að draga hana inn í hliðarherbergi. Hún kvaðst hafa barist af öllum mætti og hrópað á hann að sleppa sér. Þá hefði hún brotið rúðu í útidyrahurðinni til að vekja athygli utan frá, en enginn hefði verið á ferli.

Hæstiréttur staðfestir að frelsisskerðingin hafi verið alvarleg og aðstæður konunnar ógnvænlegar, enda hafi ákærði átt alls kostar við hana í átökum þeirra.

Eins og fyrr segir er Wojciech Marcin Sadowski gert að sæta fangelsi í fimm ár. Gæsluvarðhald hans frá 21. til 24. apríl 2013 kemur til frádráttar refsingu. Auk skaðabóta er honum gert að greiða málsvarnarlaun verjanda síns og réttargæslumanns að upphæð 1.019.688 kr. Þá er honum gert að greiða 829.997 kr í annan sakarkostnað.