Ný gögn lögð fram í nauðgunarmáli

Ríkissaksóknari mun í dag leggja fram ný sönnunargögn í máli Wojciech Marcin Sadowski sem í nóvember var dæmdur í fimm ára fangelsi í héraði fyrir að hafa nauðgað og svipt ástralska konu frelsi.

Sadowski, sem er pólskur ríkisborgari, áfrýjaði dómnum til Hæstaréttar sem mun taka málið fyrir þann 30. apríl næstkomandi. Ákæruvaldið krefst hins vegar þyngri refsingar í málinu. Skýrslutökur munu fara fram vegna gagnaframlagningarinnar í héraði sem verða í kjölfarið send Hæstarétti.

Málavextir eru þeir að maðurinn var þann 11. nóvember dæmdur í fimm ára fangelsi í héraði fyrir að hafa haldið konunni nauðugri í húsnæði í Lágmúla í Reykjavík í 30-40 mínútur. Það nauðgaði hann konunni og veittist að henni. Auk fangelsisdómsins var honum gert að greiða konunni 3,2 milljónir í bætur.

Ákæran var tvískipt. Annars vegar ákæra fyrir frelsissviptingu og hins vegar sérstaklega hættulega líkamsárás og nauðgun.

Maðurinn hitti konuna í miðbæ Reykjavíkur að kvöldi í apríl fyrir tæpu ári. Varð konan viðskila við tvo vini sína í miðborginni og bauð Sadowski henni far.

Næst sagðist konan ekki muna eftir sér fyrr en hún vaknaði í húsnæði sem líktist vöruskemmu sem verið væri að gera upp. Hún hafi haft áhyggjur af því að hún myndi missa af flugi sínu en komist að því að húsnæðið væri læst. Þá reyndi hún að vekja manninn sem vildi fá hana til að eiga við sig kynferðismök.

„Hún kvaðst hafa öskrað á hann að hún þyrfti að komast út. Þá hefði hann lamið hana og beðið hana að veita sér munnmök. Hún kvaðst hafa áttað sig á því að eina leiðin til að komast í burtu væri að eiga við hann munnmök og bíta hann. Það hefði hún gert og bitið eins fast og hún gat í getnaðarlim mannsins svo að hann hefði hlotið áverka af,“ eins og segir í ákærunni. Í kjölfarið hóf maðurinn að kýla hana og sparka í hana.

Málið verður tekið fyrir í Hæstarétti þann 30. apríl.