Landhelgisgæslan mun skila norsku byssunum

Landhelgisgæslan hyggst skila byssunum sem bárust hingað til lands frá Norðmönnum. Þessi ákvörðun var tekin eftir viðræður gæslunnar við norska herinn í gær og í dag, að því er kemur fram í tilkynningu frá gæslunni.

Gæslan segist alla tíð hafa litið á byssurnar sem gjöf frá Norðmönnum en upplýsingafulltrúi norska hersins hefur hinsvegar sagt að undirritaður hafi verið kaupsamningur upp á 11,2 milljónir króna vegna þeirra. Í tilkynningu gæslunnar frá því í kvöld segir að Landhelgisgæslan hafi hingað til ekki þurft að greiða fyrir þau vopn sem hún hefur fengið frá Norðmönnum og öðrum nágrannaþjóðum á undanförnum áratugum. Gert hafi verið ráð fyrir að það sama ætti við í þessu tilfelli.

„Mikilvægt er að endurnýja reglulega bæði vopn og tækjakost Landhelgisgæslunnar. Vegna fjárskorts líður oft langur tími á milli þess sem það er gert,“ segir í tilkynningunni. „Kaup á nýrri vopnum í stað þeirra sem Landhelgisgæslan hefur haft til umráða telst ekki til þeirra forgangsverkefna sem stofnunin leggur mesta áherslu á.

Önnur verkefni, svo sem endurnýjun björgunarþyrlna og bættur rekstrargrundvöllur skipa, eru mun brýnni. Því kom ekki til greina að verja hluta af takmörkuðu fé Landhelgisgæslunnar til að kaupa vopnin af Norðmönnum.“