Fjölgun lögreglumanna mikilvægari en vopnavæðing

Lögreglukona og mannfræðingur segirumræðu um vopnaburð lögreglumanna á villigötum. Aðgengi að vopnum sé ekki til þess fallið að auka öryggi. Frekar hætti horfa til fjölgunar lögreglumanna og endurskoðunar á námi lögreglumanna. 

Afbrotatíðni hefur lækkað jafnt og þétt síðustu tíu ár eða svo og það samhliða fækkun lögreglumanna. Eins og fram kemur í ársskýrslum Ríkislögreglustjóra er breyting á fjölda á alvarlegra ofbeldisbrota (líkamsárásir, manndráp) óveruleg.



Eyrún Eyþórsdóttir, mannfræðingur og lögreglukona, bendir á að viðbúnaður hjá lögreglu er nauðsynlegur. Engu að síður sé mikilvægt að horfa til fjölgunar lögreglumanna og náms þeirra.

Eyrún fjallar um þetta í pistli sem hún skrifar í Fréttablaðið í dag. Hann ber heitið Fleiri löggur – færri byssur. Hún segir það vera óþarfa að almennir lögreglumenn hafi aðgang að skammbyssum og hríðskotarifflum.



„Það eru margar rannsóknir sem sýna fram á að vopnuð lögregla er ekki endilega til þess fallin að auka öryggi landsmanna eða lögreglumanna,“ segir Eyrún.

Lykillinn að því að auka öryggi og öryggiskennd almennings og lögreglumanna er að fjölga lögreglumönnum á ný og færa menntun þeirra á háskólastigið.

„Og efla þannig færni og hæfni allra lögreglumanna með því og þetta er það sem allar Norðurlandaþjóðir hafa verið að gera.“

Þá segir Eyrún að lögreglan búi við breyttan veruleika í dag. Landamæralausir glæpir, mismunandi lífsskoðanir, fjölmenningarsamfélagið Ísland og fleira tengist því sem hún kallar vopnavæðingu. Hríðskotabyssurnar, sem Landhelgisgæslan kallar gjöf en Norðmenn kaup, spili þar inn í.

„Ég held að þetta auki á öryggisleysi hjá lögreglumönnum og almennt hjá fólki. Og mögulega er þetta einhver viðbrögð við því,“ segir Eyrún að lokum.