Stór tilkynning í vændum í desember

Tónlistarhátíðinni Secret Solstice verður aftur í Laugardalnum næsta sumar, dagana 19. til 21. júní en fram kemur í tilkynningu frá forsvarsmönnum Secret Solstice að tilkynnt verður um mjög þekkta listamenn sem eiga eftir að koma fram í næsta mánuði.

Secret Solstice var haldin í fyrsta sinn í sumar og hlaut hátíðinni góðar viðtökur. Á hátíðina komu um átta þúsund gestir, þar af um tvö þúsund erlendis frá.

Skipuleggjendur breyttu Laugardalnum í risastórt tónleikasvæði og tókst vel til. Fram kemur í tilkynningunni að stefnt sé að því að hafa hátíðina á næsta ári enn veglegri.

Sérstaklega á að vanda tónlistardagskrána og gera hana fjölbreyttari og betri. 150 tónlistaratriði komu fram í sumar og meðal þeirra stærstu má nefna Massive Attack, Disclosure, Woodkid, Banks, Schoolboy Q, Múm og Jamie Jones.

Secret Solstice er haldin á sumarsólstöðum á bjartasta tíma ársins.

Miðsala hófst 2.nóvember síðastliðinn og seldist fyrsta miðaþrep upp á fjórtán mínútum. Fleiri miðar á sérstöku forsölutilboði í takmörkuðu upplagi hafa verið settir í sölu á 13.900 kr. og að sögn skipuleggjanda eru þeir í þann mund að seljast upp.

Fullt verð verður 19.900 kr. Börn undir 10 ára fá ókeypis inná hátíðina í fylgd með fullorðnum.