„Ég segi fordæmisgildi þessarar aðgerðar fyrir mitt leyti er ekki neitt. Þetta er sérstök aðgerð sem að virkar með almennum hætti,“ sagði Bjarni Benediktsson í viðtali í beinni útsendingu í Íslandi í dag í kvöld.

Bjarni, sem var gestur Þorbjarnar Þórðarsonar, sagðist ekki líta svo á að aðgerðin hefði fordæmisgildi aðspurður hvort það þyrfti ekki að leiðrétta forsendurbrestinn aftur ef verðbólgan ryki upp að nýju.

Kosin til að grípa til aðgerða fyrir heimilin

Bjarni sagði að ríkisstjórnin hefði beinlínis verið kosin til þess að grípa til markvissra aðgerða sem þessarar vegna slæmrar skuldstöðu heimilanna. Það væri afleiðing mjög sérstakra aðstæðna í kjölfar efnahagshrunsins.

Bjarni sagði það ekki rétt að hann hafi verið á móti leiðréttingu sem þessari í kosningabaráttunni. Vísaði hann í landsfund Sjálfstæðisflokksins sem samþykkti að beina sérstöku kastljósi að heimilunum og skuldastöðu þeirra.

„Við lögðum upp með það að fara í markvissar stjórnvaldsaðgerðir. [...] Þessi ríkisstjórn getur ekki horft í hina áttina eftir það sem gerðist á hrunárunum. Það er einfaldlega nauðsynlegt að grípa til aðgerða,“ sagði Bjarni.

Hefur ekki áhyggjur af áhrifum á verðlag

Aðspurður um hvort hann hefði ekki áhyggjur af því að verðlag myndi hækka í kjölfar aðgerðanna sagði hann:

„Það er sjálfsagt að fylgjast með því hvort að verðlag muni hækka. [...] En ég hef meiri áhyggjur af stöðunni á vinnumarkaði. Ég hef áhyggjur af yfirlýsingum aðila vinnumarkaðarins, og þá sérstaklega yfirlýsingum launþegahreyfingarinnar, um að hér sé svigrúm til að hækka laun um marga tugi prósenta.“

Viðtalið við Bjarna má sjá í heild sinni í spilaranum hér að ofan. Eða með því að smella hér.