Bandaríkjamenn furða sig á byssusýki Íslendinga

Fréttaflutningur og umræða um vélbyssuvæðingu lögreglunnar á Íslandi hefur vart farið fram hjá nokkrum manni, og hafa tíðindi af málinu ratað yfir Atlansála alla leið til Bandaríkjanna. Guðmundur Ævar Oddsson, lektor við félags- og mannfræðideild Norður Michigan-háskóla, kennir meðal afbrotafræði þar við skólann. Þar með telst Guðmundur Ævar staðsettur í einu allra mest „byssuelskandi“ fylki Bandaríkjanna og bendir á heimildarmyndina „Bowling for Columbine“ í því samhengi.

„Nær öllum nemendum mínum í téðum afbrotafræðikúrsi (sem note bene flestir eru "criminal justice majors") finnst fréttir af frekari byssuvæðingu íslensku lögreglunnar fjarstæðukenndar í meira lagi. Sérstaklega fannst þeim tilhugsunin um MP5-árásarriffla við íslenskar aðstæður algerlega út úr kú,“ segir Guðmundur Ævar.

Hann segir nemendur ekki geta með nokkrum hætti séð hvað það er við íslenskar aðstæður sem kallar á að almennir lögreglumenn þurfi að hafa slík árásarvopn tiltæk. „Tíðni alvarlegra ofbeldisglæpa á Íslandi er til að mynda afar lág í alþjóðlegum samanburði og tilvik sem kalla á mundun skotvopna eru afar fátíð. Eins og einn nemandinn orðaði það: „It seems like they skipped a lot of steps in their arms race.“ Nemendurnir voru ennfremur á einu máli um að fyrirhugaðar aðgerðir myndu líkast til ekki auka öryggi almennings eða lögreglumanna. Höfðu nemendurnir helst áhyggjur af misbeitingu téðra árásarriffla við erfiðar aðstæður og af slysaskotum (sem eru næsta óhjákvæmileg til lengri tíma litið).“

Guðmundur Ævar bendir á að hér sé um að ræða nemendur sem allflestum er afar annt um aðra grein bandarísku stjórnarskrárinnar, sem kveður á um rétt borgara til að vopnaburðar. „Já, það er ekki öll vitleysan eins.“