Innlent

Hefði valdið verulegu tjóni á innviðum þjóðfélagsins

Gissur Sigurðsson skrifar
Frá Suðurlandsskjálftanum árið 2008.
Frá Suðurlandsskjálftanum árið 2008. VÍSIR/STEFÁN KARLSSON
Jarðskjálftinn upp á 5,7 stig í Bárðarbungu í nótt og er sá lang snarpasti frá upphafi skjálftahrynunnar, hefði valdið verulegu tjóni á innviðum þjóðfélagsins, hefði hann átt upptök undir höfuðborgarsvæðinu, að mati jarðskjálftafræðings.

Þrátt fyrir styrkleikann hafa ekki borist ábendingar um að hann hafi fundist í byggð, enda næsta byggð í óra fjarlægð. Páll Halldórsson jarðskjálftafræðingur segir að öðru máli gilti ef upptökin hefðu til dæmis orðið undir höfuðborgarsvæðinu.

„Allt okkar samfélag er meira og minna háð því að tölvur og fjarskipti gangi vel fyrir sig. Þannig að það hefur sumstaðar sýnt sig að þar sem ekki er gengið nógu vel frá svona hlutum geta skjálftar, og jafnvel minni skjálftar, valdið þar truflunum sem hafa gríðarleg áhrif á daglegt líf okkar. Við vitum hvað gerist þegar við náum ekki netsambandi eða síminn virkar ekki.“

Páll segir óverulega hættu á að mannvirki skemmist í skjálfta sem þeim sem reið yfir Bárðarbungu í nótt, miðað við að allt sé byggt samkvæmt þeim kröfum sem gerðar eru. Hann bætir við að afar ólíklegt sé þó að svona snarpur skjálfti geti orðið undir höfuðborgarsvæðinu. Annars er ekkert lát á skjálftavirkninni , sem er mest við enda berggangsins norður úr Dyngjujökli. Hann teygir sig nú rúma tíu kílómetra norður fyrir jökuljaðarinn. Upptök stóra skjálftans í nótt voru norðantil í Bárðarbunguöskjunni, en engin merki sjást um gosóróa.  


Tengdar fréttir

Um 450 skjálftar í nótt

Skjálftavirknin í nótt og í morgun hefur verið mest á um 5 km kafla norður af jökuljaðri Dyngjujökuls og nyrst í Dyngjujökli. Samkvæmt upplýsingum frá Veðurstofunni hefur virknin þar færst örlítið til norðurs. Það dró úr virkninni um miðnætti en hún jókst svo aftur um klukkan tvö og fram undir klukkan fimm.

Skjálftavirkni enn mikil og gos talið líklegt

Athuganir hafa leitt í ljós að ekki var eldgos undir Dyngjujökli í gær. Skjálftavirkni í Bárðarbungu og Dyngjujökli er samt enn mjög mikil og fagstjóri jarðvár hjá Veðurstofunni segir enn líkur á gosi. Engu að síður hafa almannavarnir fært viðbúnaðarstig norðan Vatnajökuls niður í hættustig úr neyðarstigi.

700 skjálftar frá miðnætti

Skjálftavirknin við Bárðarbungu hefur þokast áfram til norðurs og er að mestu á 10 kílómetra löngu bili, með miðju undir jökuljaðrinum.

Stærsti skjálftinn á svæðinu frá 1996

Skjálftar næturinnar eru þeir stærstu í þessari hrinu og jafnframt stærstu skjálftarnir á svæðinu frá því fyrir Gjálpargosið fyrir átján árum síðan.

Gosóróinn í Gjálp hófst daginn eftir þann stóra

Jarðskjálftinn í nótt upp á 5,3 stig beinir enn sjónum að Gjálpargosinu í Vatnajökli árið 1996. Þá var það einmitt skjálfti af þeirri stærð sem talinn er hafa hrundið eldgosinu af stað.

Skjálftavirkni mikil í nótt

Ekkert hefur dregið úr skjálftavirkni í nótt. Tveir skjálftar yfir 5.0 hafa mælst frá því á miðnætti.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.