Ekki hægt að vera ritstjóri þar sem er ágreiningur og ólga

Reynir Traustason, ritstjóri blaðsins, segist ekki gera sér fyllilega grein fyrir því hvað muni fara fram á fundinum. 

„Það getur svosem flest gerst en ég vonast eftir farsælli niðurstöðu og er tiltölulega bjartsýnn á hana, fyrir hönd blaðsins og þá stefnu sem blaðið hefur fylgt og að eignarhaldið verði tiltölulega til friðs.

Hvað með þig sjálfan? Heldurðu að þú komir út af fundinum sem ritstjóri?

„Ég kem út af fundinum sem ritstjóri en hvort ég endist helgina er svo önnur saga. Ég reikna með að vera ritstjóri áfram og hef engin önnur áform,“ segir Reynir en bætir við að það er annarra að meta það.  

„Hvor niðurstaðan fyrir mér er farsæl því að það gengur ekkert að vera ritstjóri á fjölmiðli þar sem er ágreiningur og ólga. Bjössi í World Class er mjög ósáttur við að ég verði þarna og svo eru aðrir mjög ánægðir. Ég mun leitast við að vera í sæmilegri sátt við hluthafa,“ segir Reynir.

Hann segist sjálfur muni verða hluthafi áfram um óljósa framtíð en að hann muni minnka hlut sinn. Hann sé trúr þeirri skoðun sinni að það eigi að vera margir litlir hluthafar í félaginu frekar en fáir stórir.