Neytendasamtök á Ítalíu kæra Suárez

Luis Suárez, framherji úrúgvæska landsliðsins í knattspyrnu, gæti þurft að mæta í réttarsal á Ítalíu á næstunni vegna kæru sem neytendasamtök þar í landi hafa lagt fram gegn honum.

Samtökin heita Codacons en þau voru stofnuð árið 1986 og sérhæfa sig í að verja umhverfið og rétt neytenda.

Ítölsk lög heimila kærur vegna atvika sem gerast utan landsins sé fórnarlambið ítalskt. Dómstóllinn í Róm staðfestir að málið liggi fyrir hjá sér.

„Nú bíðum við bara eftir að sjá hvað dómstólinn ákveður. Ef þeir viðurkenna, eins og við bendum á, að hegðun Suárez sé glæpsamleg þá geta menn skoðað myndbönd og myndir af atvikinu,“ segir CarloRienzi, forseti Codacons-samtakanna, við Mediaset.

Hvorki Chiellini né ítalska knattspyrnusambandið koma nálægt kærunni. Hún er alfarið í höndum þessara neytendasamtaka.

Codacons hefur áður staðið í fótboltatengdum kærum. Eitt sinn kærði það ítölsku A-deildina vegna mistaka dómara í einum leik og héldu fram að fólk sem hefði horft á viðkomandi leik eða veðjað á hann hefði verið svikið.