Umfjöllun, viðtöl og einkunnir: Fram- FH 0-4 | FH aftur á toppinn

FH-ingar tylltu sé á ný á topp Pepsi-deildar karla með 4-0 sigri á Frömurum í Laugardalnum. Kristján Gauti Emilsson 21 árs framherji í liði FH var allt í öllu í spili liðsins og átti hann þátt í  þrem mörkum leiksins af fjörum. Tvö mörk og ein stoðsending.

FH-ingar settu tóninn snemma í Laugardalnum og skoraði Kristján Gauti mark strax á sjöundu mínútu leiksins frá markteig eftir skemmtilegt samspil við Atla Viðar. FH-ingar gjörsmlega keyrðu yfir heimamenn á fyrstu 20 mínútum leiksins og voru Framarar ansi hreint værukærir í byrjun leiks.

Framarar tóku loks við sér undir lok fyrri hálfleiks og í raun var það þeirra skársti kafli þeirra í leiknum. Alexander Már gerði sig líklegan í nokkur skipti en náði ekki að klára sín færi. Staðan 0-1 þegar flautað var til leikhlés. Sanngjörn staða.

FH-ingar bættu allhressilega í þegar seinni hálfleikurinn hófst. Viktor Bjarki fór meiddur út af í hálfleik og það gerði stöðu Framliðsins enn verri.  Kristján Gauti kláraði í raun leikinn strax eftir þriggja mínútna leik í seinni hálfleik, þá snéri hann á Einar Bjarna og komst upp að endamörkum og aðþrengdur náði hann skoti á nærstöngina sem Ögmundur varði inn. 0-2 og staðan orðin virkilega erfið fyrir heimamenn.

Tíu mínútum síðar á 58. mínútu gerði Atli Viðar endanlega út um leikinn. Nafni hans Guðnason fékk þá boltann við vítateigsbogann vinstra meginn, átti lúmsk bogaskot sem Ögmundur varði klaufalega beint út í teiginn og þar var Atli Viðar Björnsson mættur eins og gammur og kláraði auðveldlega af stuttu færi.

Það sem eftir lifði leiks einkenndist leikurinn af yfirburðum FH-inga. Þeir spiluðu oft á tíðum vel á milli sín á meðan Framarar eltu og spörkuðu boltanum oft fram í algjörri örvæntingu. Loks náðu FH-ingar svo fjórða markinu á 87. mínútu þegar Kristján Gauti komst upp að endamörkum vinstra megin þar sem hann skaut að marki og með viðkomu í Tryggva Bjarnasyni fór boltinn í netið. Lokastaðan 0-4 sigur FH-inga sem var síst of stór.

Það er margt jákvætt sem FH-ingar geta tekið úr leiknum. Sóknarleikur þeirra leit mjög vel út og Heimir Guðjónsson þjálfari ætti geta glaðst yfir því að markastíflan í sóknarleiknum virðist loksins  brostin.

Kristján Gauti var frábær og það var gaman að sjá hversu vel hann vann með varnamenn í bakinu. Margsinnis snéri hann á þá með einni snertingu og litu miðverðir Framara oft á tíðum illa út.  Hewson og Davíð Þór voru óþreytandi á miðjunni og Atli og Ólafur Páll sífellt ógnandi á köntunum. 

Lítið var um jákvæða hluti hjá Frömurum og eflaust hafði það mikið að segja að þrír leikmenn voru í leikbanni auk þess sem Jóhannes Karl var meiddur. Slík blóðtaka er of mikil fyrir lið eins og Fram.

FH-ingar tóku öll völd á miðjunni strax í byrjun leiks og oft á tíðum var það átakanlegt að horfa upp á miðjumenn Fram sparka boltanum eitthvað út í buskann í stað þess að reyna að byggja upp spil. Líklegast var þetta versti leikur Framara í sumar og margt og mikið hægt að bæta.

Kristján Gauti: Veit ekki hvað breyttist í dag

Kristján Gauti Emilsson maður leiksins hjá Vísi var sáttur með leik sinna manna og sérstaklega var hann ánægður með að liðið virðist vera byrjað að skora mörk í hrönnum.

„Við erum gríðarlega sáttir með okkur leik og við náðum að gera það sem við ætluðum að gera gegn Þór, að klára leikinn almennilega og í stað þess að slaka á eins og við gerðum gegn Þór mættum við klárir til leiks í seinni hálfleikinn. Ég veit ekki alveg hvað breyttist í dag en loksins náðum við að setja mörg mörk á andstæðinginn. Það hefur kannski hingað til vantað aðeins meiri áræðini hjá okkur fram á við en það gerðist eitthvað í dag.  Ég er sáttur með mína frammistöðu en auðvitað er ég ánægðastur bara með stigin þrjú,“ sagði hann eftir leik.

Aðspurður um persónuleg markmið í sumar og hvort hann stefni aftur út hafði Kristján þetta að segja. „Ég hef verið að skora mörk og þótt það hafi ekki gengið vel í fyrra þá vissi ég alveg að ég gæti skorað og búið til mörk. Ég ætla bara að halda því áfram og nú einbeiti ég mér bara að FH enda stendur mér ekkert til boða að fara til útlanda núna.“

Bjarni: Sýndu styrk sinn og refsuðu

Bjarni Guðjónsson þjálfari Framara var skiljanlega ósáttur með frammistöðu sinna manna og úrslit leiksins. „Við söknuðum auðvitað mannanna sem voru í banni og meiddir en það á ekki að vera nein afsökun. Mér fannst fyrri hálfleikurinn ágætur af okkar hálfu en í seinni hálfleik sýndu þeir styrk sinn og refsa okkur við hvert tækifær,“ sagði Bjarni.

Aðspurðu hvort varnarleikurinn sé áhyggjuefni sagði Bjarni: „Það er ekki gott að fá á sig fjörgur mörk en við vorum bara að spila gegn feikilega sterku liði. Varnarleikurinn er vissulega eitthvað sem við þurfum að vinna í. “