Mörg félög fylgjast með Aroni Elís

Magnús Agnar Magnússon, umboðsmaður Víkingsins Arons Elísar Þrándarsonar, segir að mörg félög hafi augastað á kappanum.

Hann segir ekkert fast í hendi en að fulltrúar margra félaga hafi gert sér ferð hingað til lands til að sjá hann spila - nú síðast í þessari viku.

Aron skoraði eitt og lagði upp annað í 2-1 sigri Víkings á Val í gærkvöldi og hefur vakið verðskuldaða athygli fyrir frammistöðu sína í Pepsi-deild karla í vor.

Rætt var við Magnús Agnar og Aron Elís sjálfan í kvöldfréttum Stöðvar 2 en ítarlegt viðtal við þann síðarnefnda verður í Fréttablaðinu á morgun.