Viðskipti innlent

Reyðarfjörður valinn sem olíubær Íslands

Kristján Már Unnarsson skrifar

Eykon Energy hefur valið Reyðarfjörð sem þjónustumiðstöð fyrir bæði olíuleit og olíuvinnslu á Drekasvæðinu. Formaður bæjarráðs Fjarðabyggðar segir þetta skapa gríðarleg tækifæri. Ekki færri en fimm staðir hafa sóst eftir þessu verkefni; Akureyri, Húsavík, Vopnafjörður, Seyðisfjörður og Reyðarfjörður, - sem Eykon hefur nú valið.

Eykon er aðili að þriðja og stærsta sérleyfinu með kínverska ríkisolíufélaginu CNOOC og norska ríkisolíufélaginu Petoro. Eykon er jafnframt í fyrsta leyfinu í gegnum dótturfélag sitt, Kolvetni, ásamt Petoro og kanadíska félaginu Ithaca. Þar með hafa tveir af þremur sérleyfishöfum á Drekasvæðinu kosið Reyðarfjörð en handhafar leyfis númer tvö höfðu áður valið Húsavík.

Haukur Óskarsson, framkvæmdastjóri iðnaðar hjá Mannviti og stjórnarmaður í Eykon.

Að sögn Hauks Óskarssonar, stjórnarmanns í Eykon og framkvæmdastjóra iðnaðar hjá verkfræðisstofunni Mannviti, var einkum þrennt sem réði úrslitum um valið á Reyðarfirði; staðsetning, innviðir og samfélag sem hefur reynslu af því að taka á móti stórum verkefnum. Í Fjarðabyggð og á Fljótsdalshéraði hafi byggst upp sterkt bakland fyrir starfsemi af þessu tagi, fjölbreytt flóra fyrirtækja hafi þar vaxið og dafnað eftir að álverið kom. Þá sé stutt í alþjóðaflugvöll á Egilsstöðum.

Jens Garðar Helgason, formaður bæjarráðs Fjarðabyggðar.Stöð 2/Baldur Hrafnkell Jónsson.

Formaður bæjarráðs Fjarðabyggðar, Jens Garðar Helgason, segir þessa ákvörðun skapa gríðarleg tækifæri en í viðtali við Stöð 2 fyrir tveimur árum sagði hann Reyðarfjörð þegar hafa alla þá innviði sem þyrfti vegna þjónustu við olíuleit. Þar væri meðal annars atvinnuslökkvilið, smiðjur sem byggst hefðu upp vegna stóriðjunnar, bæði Launafl og VHE, og hafnaraðstaðan væri tilbúin með 90 metra löngum hafnarbakka og landrými í kring.



„Þannig að við erum í raun tilbúnir að taka við þessari þjónustu ef hún vill koma hingað," sagði Jens Garðar.

Frá Vopnafirði.Mynd/Stöð 2.

Vopnafjörður og Langanesbyggð hafa lengi sóst eftir þessu hlutverki en Haukur Óskarsson segir að þar sé ekki það bakland sem þurfi og í raun hafi Eykon aðeins talið Reyðarfjörð og Akureyri koma til greina. Þar hafi Reyðarfjörður vinninginn vegna staðsetningar gagnvart Drekasvæðinu.

Akureyri varð undir í samkeppninni vegna fjarlægðar frá Drekasvæðinu.Mynd/Stöð 2.

Tengdar fréttir

Risahöfn og olíuiðnaður inn á skipulag Langanesbyggðar

Skipulagsstofnun hefur fallist á aðalskipulag Langanesbyggðar sem gerir ráð fyrir risahöfn í Finnafirði og lóðum undir olíu- og gasiðnað og bíður það nú staðfestingar umhverfisráðherra. Sveitarstjórnarmenn á Norðausturlandi hafa lengi horft til þeirra tækifæra sem siglingar yfir Norðurheimskautið og olíuleit gætu skapað og komu stórskipahöfn í Gunnólfsvík við Langanes inn á aðalskipulag fyrir átta árum.

Óska eftir að Húsavík verði þjónustuhöfn Drekasvæðis

Olíufélög sem undirbúa leit á Drekasvæðinu hafa óskað eftir því að Húsavík verði þjónustuhöfn fyrir borpalla. Umsókn um lóð hefur verið send til bæjarráðs Norðurþings, sem tekur jákvætt í erindið. Fyrstu tvö sérleyfin voru afhent í byrjun janúar og merki sjást nú um að félögin eru byrjuð að undirbúa leitina. Fulltrúar annars leyfishafans, Íslensks kolvetnis, Faroe Petroleum og Petoro, hafa nú sótt um lóð við Húsavíkurhöfn undir aðstöðu til að þjónusta leitarborpalla. Í fundargerð bæjarráðs Norðurþings kemur fram að óskað er eftir svæði til að geyma pípur og borstangir, svæði fyrir sementstanka og leðjutanka, lóð undir vöruhús og tengingum við vatn, olíu og rafmagn.

Eyfirðingar þjónusta olíuleitarflota af Drekasvæðinu

Floti fjögurra olíurannsóknarskipa kom inn til Akureyrar í dag af Drekasvæðinu til að sækja sér vistir og þjónustu sem og til áhafnaskipta. Eyfirðingar fá þarna forsmekkinn af þeim umsvifum sem vaxandi olíuleit í Norðurhöfum gæti skapað á Íslandi á næstu árum. Rannsóknarskipið Nordic Explorer fer fyrir flotanum en með því eru þrjú fylgdarskip, tvö færeysk og eitt íslenskt, Valberg VE.

Viljayfirlýsingar komnar um þrjár þjónustuhafnir fyrir olíuborpalla

Olíudreifing hefur í samstarfi við stærsta þjónustufyrirtæki heims við olíuborpalla gert viljayfirlýsingar síðustu tvo daga um að hafnirnar á Reyðarfirði, Húsavík og Akureyri verði þjónustumiðstöðvar við olíuleit á Jan Mayen-hryggnum og við Austur-Grænland. Spáð er að fyrsti borpallurinn komi á Drekasvæðið eftir eitt ár til þrjú ár.

Svona gætu íslenskir olíubæir litið út

Norska olíuævintýrið dreifist nú út í byggðir Norður-Noregs eftir því sem olíu- og gasvinnslan færist norðar á bóginn. Dæmi eru um að húsnæðisverð tvöfaldist í bæjum þar sem aðstæðum svipar mjög til Íslands.

Norðmenn skoða Ísland sem þjónustumiðstöð olíuleitar

Norðmenn gera í nýrri skýrslu um olíuleit á Noregshluta Jan Mayen-hryggjarins ráð fyrir þeim möguleika að þjónustunni verði sinnt frá Íslandi. Þrefalt lengra er að þjónusta borpalla frá Noregi. Það eru ekki bara Íslendingar sem áforma olíuleit á Jan Mayen-svæðinu. Norðmenn eru einng komnir á fullt við að undirbúa leit sín megin og miðað við þann kraft sem þeir hafa nú sett í málið gæti svo farið að þeir verði fyrri til að hefja boranir á svæðinu, jafnvel árið 2017.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×