Vörustjóri sendur í leyfi

Stjórn Húsasmiðjunnar hefur kynnt sér efni ákæra á sex núverandi starfsmenn Húsasmiðjunnar ehf. vegna meintra samkeppnislagabrota.

Niðurstaða stjórnarinnar er að vörustjóri grófvöru fari í tímabundið leyfi frá störfum sínum hjá fyrirtækinu en þetta kemur fram í fréttatilkynningu frá Húsasmiðjunni.

Fram kemur í tilkynningunni að ekki eru talin efni til þess að senda aðra starfsmenn Húsasmiðjunnar í leyfi, en hinir sem sæta ákæru í málinu eru þrír starfsmenn þjónustuvers, framkvæmdastjóri verslanasviðs og núverandi framkvæmdastjóri fagsölusviðs. Málið sé nú í höndum dómstóla.

„Ákærur sérstaks saksóknara eru fyrirtækinu vonbrigði og þeim starfsmönnum sem í hlut eiga þungbærar. Þrátt fyrir að Húsasmiðjan ehf. sé ekki undir rannsókn vegna framangreinds máls mun félagið í samvinnu við fyrrverandi eigendur Húsasmiðjunnar veita framangreindum starfsmönnum aðstoð varðandi málið.“

Í tilkynningunni kemur fram að eins og áður hafi komið fram áttu þau atvik, sem urðu tilefni afskipta Samkeppniseftirlitsins, sér stað áður en danska byggingavörukeðjan Bygma Gruppen A/S keypti rekstur og eignir Húsasmiðjunnar af Framtakssjóði Íslands í desember 2011.

„Fyrri eigendur Húsasmiðjunnar tóku við söluna fulla ábyrgð á mögulegum skuldbindingum gagnvart íslenskum yfirvöldum vegna meintra samkeppnislagabrota sem Samkeppniseftirlitið hefur til meðferðar. Stjórnendur og starfsmenn Húsasmiðjunnar hafa á undanförnum þremur árum hlotið reglulega fræðslu um samkeppnismál og samkeppnisrétt frá óháðum fagaðilum.“

Nýtt félag um rekstur Húsasmiðjunnar tók til starfa í ársbyrjun árið 2012 og er félagið hluti af Bygma samstæðunni. Nýr forstjóri var ráðinn til starfa hjá Húsasmiðjunni sumarið 2013 og nokkrar breytingar hafa orðið á yfirstjórn fyrirtækisins. Húsasmiðjan og Bygma samstæðan í heild hafa að leiðarljósi að stunda ávallt virka samkeppni.