Björgólfur Takefusa spilar með Fram í sumar

Björgólfur Takefusa hefur ákveðið að spila með Fram í Pepsi-deild karla í sumar og er búinn að gera samning við Safamýrarliðið út tímabilið en þetta staðfesti Sverrir Einarsson, formaður Knattspyrnudeildar Fram, við Vísi í kvöld.

„Þetta gerðist mjög hratt. Hann er fínu standi og við sömdum við hann með kvöldinu og þetta er bara klárt," sagði Sverrir í samtali við Vísi í kvöld.

„Hann kom á æfingu og virðist vera í góðu standi. Ég veit ekki hvernig þetta gerðist, þetta poppaði allt í einu upp og einhver atburðarrás fór í gangi. Við gengum síðan frá þessu núna," sagði Sverrir kátur með nýja liðsmanninn.

Framarar hafa aðeins fengið eitt stig út úr fyrstu tveimur leikjum sínum í Pepsi-deildinni í sumar og Safamýrarliðið hefur einnig misst lykilmenn í meiðsli í fyrstu umferðunum.

Björgólfur náði sér ekki á strik í herbúðum Vals á Hlíðarenda en hefur í mörg verið einn allra hættulegasti framherji deildarinnar og ætti að koma með mikla reynslu inn í ungt Framlið.  

Björgólfur er einn markahæsti leikmaðurinn í sögu úrvalsdeildar karla í fótbolta en aðeins sjö leikmenn hafa skorað fleiri mörk en hann í efstu deild.

Björgólfur Takefusa var síðast í herbúðum Vals en lék ekkert með Valsmönnum eftir sjö fyrstu umferðirnar í fyrra.

Björgólfur heldur upp á 34 ára afmælið sitt um helgina en hann hefur skorað 83 mörk í 173 leikjum í efstu deild fyrir Þrótt, Fylki, KR, Víking og Val.