Foreldrum barnsins ekki greint frá niðurstöðum eineltisrannsóknar

„Ég hef reynt í allan dag að fá upplýsingar en án árangurs. Mér er bent á að senda inn formlegt erindi,“ segir Helga Vala Helgadóttir, lögmaður foreldra barnsins.  

Foreldrar barna í Vesturbæjarskóla fengu sendan tölvupóst í morgun þess efnis að kennari sem sakaður er um einelti muni snúa aftur til starfa næstkomandi föstudag. Þá kom fram að niðurstöður Barnaverndar Reykjavíkur, fagráðs eineltismála í grunnskólum og úttektarskýrsla sem óháðir aðilar unnu fyrir skóla- og frístundasvið liggi nú fyrir og að foreldrum viðkomandi nemanda hafi þegar verið greint frá niðurstöðunum.

Foreldrum barnsins sem varð fyrir meintu einelti af hálfu kennarans hefur þó ekki verið greint frá niðurstöðum fagaðila. Hildur Hafstað, skólastjóri Vesturbæjarskóla, staðfesti það þó í tölvupósti sem sendur var á foreldra barna í skólanum. 

Sviðsstjóri skóla- og frístundasviðs Reykjavíkur ásamt foreldrum barnsins fóru á þess leit að Barnavernd Reykjavíkur taki til skoðunar ásakanir um ofbeldi og einelti kennara í skólanum á grundvelli barnaverndarlaga á síðasta ári. Lítið hefur gerst í þeim málum og lítið hefur verið um svör.