"Það er allt of mikið af köllum í þessum störfum"

Dagur helgaður stelpum og tækni er haldinn víða um Evrópu og meðal annars hér á landi í dag. Tilgangurinn er að kynna tæknimenntun og störf fyrir ungum stúlkum til að hvetja þær til að hugleiða tæknitengt nám i framtíðinni.

„Þær fá að taka þátt í ýmsikonar viðburðum, meðal annars að spreyta sig í vefforrinun, spjalla um gervigreindarrannsóknir, félagslega gervigreind og fá einnig að prufa sig áfram með forritnun," segir Kristine Helen Falgren, fulltrúi atvinnu- og iðnaðartengsla við Háskólann í Reykjavík.



„Það er skortur á stelpum og konum í tæknigeiranum um allan heim og dagurinn í dag snýst um að kynna þennan möguleika fyrir stelpum. Við teljum að ein af ástæðum þess að stelpur velja sér ekki tækninám sé sú að þær viti ekki hvað þetta er," segir Ingibjörg Ósk Jónsdóttir, nemi í hugbúnaðarverkfræði og ein stofnenda /systra.

Það voru 80 stelpur úr fimm skólum sem boðið var að taka þátt í dagskrá dagsins. Þær eru allar í áttunda bekk og fannst viðmælendum fréttastofu dagurinn mikilvægur.

„Já það er allt of mikið af köllum í þessum störfum," segir Birta Björg Heiðarsdóttir, nemandi í Laugalækjarskóla.