Ekið á ómerkta tík

Ekið var á Husky tík við Rauðavatn um kvöldmatarleytið í kvöld. Slasaðist hundurinn nokkuð og þykir líklegt að tíkin sé brotin á fæti eða mjöðm auk þess sem annar fóturinn fór úr lið.

Lögreglan á höfuðborgarsvæðinu greindi frá því í kvöld að farið hefði verið með tíkina á Dýralæknastofu Reykjavíkur þar sem læknir á bakvakt tók á móti henni. Ljóst var að tíkin þyrfti að fara í aðgerð en sá hængur var á máli að óvissa ríkti um eiganda hundsins.

Þannig var tíkin ekki örmerkt og grá ól, sem hún bar um hálsin, var ómerkt. Auglýsti lögregla eftir eiganda hundsins sem gaf sig fram síðar í kvöld.

Post by Lögreglan á höfuðborgarsvæðinu.