Mikill eldur í Rimaskóla

Mikill eldur kom upp í Rimaskóla í Grafarvogi rétt fyrir tólfleytið í dag. Eldurinn kom upp í mannlausu húsnæði sem stendur við skólann.

Samkvæmt upplýsingum lögreglu var skúrinn, sem sjá má á myndinni að ofan, mannlaus þegar eldurinn kom upp. Hann ku ekki vera í notkun.

Nemendur í skólanum voru úti í frímínútum þegar eldurinn kviknaði og lagði fjöldi barna leið sína í átt að skúrnum til að fylgjast með því sem fyrir augu bar. Kennarar náðu þó fljótlega að skerast í leikinn og voru allir nemendur fluttir í íþróttasal skólans.

Slökkviliðinu tókst að ná tökum á eldinum fljótlega en mikill reykur barst í átt að skólanum og inn í einhverjar skólastofur.

„Þetta var rosalegur eldur og eðlilega skapaðist nokkur hræðsla á meðal nemenda skólans,“ sagði starfsmaður Rimaskóla í samtali við Vísi, skömmu eftir að eldurinn kom upp.

„Sem betur fer er í góðu lagi með alla nemendur og það er það sem skiptir máli."

Búið er að senda tölvupóst til foreldra barna í skólanum þar sem fram kemur að ekki þurfi að sækja börnin. Búið sé að reykræsta þær stofur þangað sem reykur barst og skólahald muni halda áfram.

Ef lesendur Vísis hafa nánari upplýsingar eða myndir frá vettvangi þá er bent á tölvupóstfangið ritstjorn@visir.is.