„Aumingja útgerðin“

„Aumingja útgerðin,“ heyrðist kallað úr þingsal í óundirbúnum fyrirspurnartíma á Alþingi í dag.  Árni Páll Árnason, þingmaður Samfylkingarinnar. beindi máli sínu til Bjarna Benediktssonar, fjármála- og efnahagsráðherra, þegar hann spurði hvort ekki væri ráð að leggja gjald á nýjar tegundir og upphafsgjald í makríl.

Frumvarp ríkisstjórnarinnar um breytingar á veiðigjöldum var afgreitt úr þingflokkum sjálfstæðis- og framsóknarmanna í síðustu viku. Frumvarpið var lagt fram á Alþingi og hefur þingheimur átta daga til að afgreiða frumvarpið. Breytt veiðigjöld koma til með að skila átta milljörðum í ríkissjóð.

„Það er að koma meira og meira í ljós hversu mjög fyrrverandi ríkisstjórn var úti á túni í álagningu gjaldsins á síðasta kjörtímabili. Algjörlega úti á túni,“ sagði Bjarni Benediktsson í pontu í dag. Hann sagði spurninguna sem stæði uppi væri hversvegna fyrri ríkisstjórn hafi ekki lagt þetta gjald á úthlutun makrílsins.

„Það verður á stefnuskrá þessarar ríkisstjórnar að hefja slíka gjaldtöku en hinsvegar hefur það verið okkur þeim mun meira í mun að sú gjaldtaka sem ríkið tekur til sín vegna aflaheimilda sé í einhverjum tengslum við afkomuna í viðkomandi veiðum.“

Ekki er víst hvort Alþingi tekst að afgreiða frumvarpið á þeim tíma sem eftir er.  Allt bendir til þess að kallað verði til sumarþings takist það ekki til að hægt verði að leggja þessi gjöld á þegar nýtt fiskveiðiár hefst, 1. september nk.