„Það er svo erfitt að vera með pung“

„Mér hefur rosalega lengi verið illa við þessar óformlegu reglur um að karlar eigi að gera þetta og hitt og að hinir og þessir hlutir séu ekki karlmannlegir,“ segir Einar Sverrir Tryggvason kvikmyndatónskáld, sem skrifaði ljóð á Facebook-síðuna Kynlegar athugasemdir.

Ljóðið hefur hlotið fádæma viðbrögð inni í hópnum, á einni klukkustund hafa um fimm hundruð manns smellt á „læk-hnappinn“ fræga og hrannast „lækin“ upp.

Á síðunni getur fólk vakið athygli á ýmsu er viðkemur umræðunni um kyn og kynjahlutverk. Síðan hefur slegið í gegn á netinu, á þeim tveim dögum sem hún hefur verið uppi hafa á sjötta þúsund manns skráð sig í hana.



Ljóð Einars um karlmennsku er ein vinsælasta færslan á síðunni. Með ljóðinu virðist hann ná að fanga skoðanir margra á hefðinni og umræðunni í samfélaginu er snýr að karlmennsku.

„Hugmyndin að ljóðinu sem slíku varð til fyrir einni eða tveimur vikum,“ segir Einar í samtali við Vísi og bætir við:

„Svo þegar þessi grúppa, Kynlegar athugasemdir, varð til, þá inspíreraði hún - og frásagnir fólks í henni - mig til að drífa í því að ljúka við það og smella því inn.“

Ljóðið vinsæla lítur svona út:

Að fæðast sem karlmaður - byrðin er þung.

Það er svo erfitt að vera með pung.

Því karlmennskustöðunni fylgja sko skyldur

sem hlýða þarf viljir þú karl teljast gildur!

Sem strákar við leikum með byssur og kalla

“Spiderman”, “Hulk”, “Power Rangers” - en ekki alla.

Því skærbleiki ‘rangerinn’ er ekki töff,

Allt sem er bleikt er ei karlmennskustöff!

Og dúkkur og “Ponies” og slíkt stelpudót

er bannað með öllu, sért þú ei snót!

Sem karlmenn við kunnum að smíða og laga

og henda upp skúr innan nokkurra daga.

Ekki er til bíó sem við megum grát’ í

og við greinum strax muninn á Lexus og Audi!

Við kunnum sko allt það sem hægt er um bíla

og vitum að íþróttir verðum að fíla!

Ef förum á djammið við ‘swagginu’ flíkum

og höstlum og sofum hjá “mellum og tíkum”.

Stundum við sambandið jafnvel í slysumst,

en karlrembudjókana samt við með gysumst!

Því fyndnasti djókur sem til er í heimi:

“Konan? Ég hana inn í eldhúsi geymi!”

Við höfum svo hobbý sem pungnum vel passar:

Fótbolti, tölvuspil, túttur og rassar!

Allt sem við hlustum á ‘butch’ þarf að vera:

Metallica, Robin Thicke, Snoop og Pantera.

Við hlýðum á ekta testósteróntóna

við myndbönd með gellunum til á að góna.

Því allt okkar áhorf þarf stöðlum að hlýða:

Sprengingar og/eða gellur að ríða.

Einungis kellingar horfa á annað

og þess vegna er “Twilight” og “Gossip Girl” bannað!

Við vinnum störf sem okkar karlmennsku hæfir,

því vinnuföt hjúkkunnar pungstyrkinn kæfir!

Við lyftum og berum og skiptum út perum

og 75% stjórnenda erum!

Svo fáum við fyrir það borgað mun betur

því konur þær geta ekki allt sem karl getur!

Svona eru reglurnar, skýrar og góðar:

Að hunsa þær bendir til batnandi þjóðar.