Katrín hjálpaði Liverpool að vinna Man. City

Katrín Ómarsdóttir og félagar hennar í kvennaliði Liverpool hófu titilvörnina í ensku úrvalsdeildinni með sigri í gær en Liverpool vann þá Manchester City 1-0 á heimavelli.

Stelpurnar unnu því City alveg eins og karlalið félagsins gerði um síðustu helgi en Liverpool-karlarnir stigu þá stórt skref í átt að fyrsta Englandsmeistaratitlinum í 24 ár.

Natasha Dowie skoraði mörg mörk á leið Liverpool að enska meistaratitlinum á síðasta ári og hún skoraði eina mark þessa leiks á 70. mínútu.

Íslenska landsliðskonan Katrín Ómarsdóttir spilaði allan leikinn á miðju Liverpool en hún var fastamaður í liðinu á titilárinu í fyrra.