Upp­gjörið: Fram - Þróttur | Þróttarar stöðva sigur­göngu Fram

Fram tók á móti Þrótti í 10. umferð Bestu deildar kvenna á Lambhagavelli í kvöld. Þróttur sigraði leikinn og er þar með búin að endurheimta topp sætið í bili, en Breiðablik og FH eiga eftir að spila leiki sína.

Þróttur byrjaði leikinn af krafti og skoraði fyrsta mark leiksins á 4. mínútu. Elaina varði skot Þórdísar Elvu Ágústsdóttir en Jelena Tinna Kujundzic náði frákastinu og kom boltanum yfir línuna.

Þróttarar voru afar öflugar í fyrri hálfleik og bættu við öðru marki á 23. mínútu eftir hornspyrnu Katie Cousins þar sem Unnur Dóra Bergsdóttir skoraði laglegt skallamark.

Þróttur átti einstaklega góða spilakafla, fullt af hornspyrnum og heimakonur heppnar að fara einungis tveimur mörkum undir út úr fyrri hálfleik.

Seinni hálfleikur var jafnari og áttu bæði lið góða spilkafla.

Á 81. mínútu bætti Þórdís Elva Ágústsdóttir við stórkostlegu þriðja marki Þróttar, sláin og inn. Caroline Murray leikmaður Þróttar gaf stoðsendinguna og er það síðasta framlag hennar því hún fer nú á vit ævintýranna til Bandaríkjanna að spila.

Fram náði aðeins að klóra í bakkann á 84. mínútu og skoraði Sara Svanhildur Jóhannsdóttir laglegt mark upp úr aukaspyrnu frá Elainu Carmen La Macchia markmanni Fram.

Fleiri urðu mörkin ekki og með sigrinum fer Þróttur með 25 stig inn í landsleikjahléið og trónir á toppi deildarinnar það sem af er umferðar.

Atvik leiksins

Á 7.mínútu leiksins er dæmt brot á Sæunni Björnsdóttir í aðdraganda hornspyrnu Þróttar. Það sem glöggir sáu hins vegar var það að markvörður heimakvenna Elaina Carmen La Macchia gerði sér lítið fyrir og reif Sæunni Björnsdóttir niður á hárinu.

Stjörnur og skúrkar

Katie Cousins skilar alltaf sínu, einstaklega góð á miðjunni að stýra spilinu.

Jelena Tinna Kujundzic er frábær í hjarta varnarinnar, góð með boltann og líkt og Katie Cousins nær hún að stýra spilinu vel.

Unnur Dóra Bergsdóttir skoraði glæsilegt skallamark og var flott í sóknarleiknum.

Þórdís Elva Ágústsdóttir er ómissandi á miðjunni og svo skoraði hún þriðja mark Þróttar sem var af dýrari gerðinni.

Stemning og umgjörð

Leikurinn er á föstudegi kl. 18:00 og allir og vinir þeirra voru á leiðinni út úr bænum en það kom ekki að sök, hér voru allir mættir tímanlega og í góðu skapi.

Umgjörðin hjá Fram er frábær og ég mæli eindregið með því að mæta á leik á Lambhagavelli.

Dómarar

Bríet Bragadóttir, Kári Mímisson og Eydís Ragna Einarsdóttir dæmdu þokkalega í dag. Nokkur brot sem hefði alveg mátt dæma á. Svo gerðist eitt skemmtilegt Bríet Bragadóttir dæmdi hornspyrnu eftir að Mollee Swift hélt á boltanum lengur en 8 sekúndur en það er ný regla fyrir þá sem vita ekki. Annars fær tríóið bara góða sjöu frá mér.

Óskar Smári: Gáfum þeim ansi mikið forskot

Þróttur skoraði tvö mörk á 23 mínútum og áttu heimakonur erfitt með að verjast sóknum þeirra.

„Fyrri hálfleikur var ekki alveg nógu góður hjá okkur, við vorum ekki nægilega góðar. Þær skora úr tveimur föstum leikatriðum, það var of mikið af plássi opnu hjá okkur og við vorum ekki nógu ákveðin í varnarleiknum okkar.

Mér fannst seinni hálfleikur miklu betri, en Þróttur er stútfullt af gæðum og góðum leikmönnum. Þær eru vel skipulagðar og þegar við erum ekki ‘’on’’ í varnarleiknum eins og í föstum leikatriðum og fáum á okkur tvö mörk þá er það ansi mikið forskot sem við erum að gefa góðu liði,“ sagði Óskar

„Við erum spennt fyrir hléinu, ég er þakklátur fyrir stelpurnar fyrir fyrri hluta tímabils, að vera með fimm sigra og fimm töp áður en pásan kemur er góð staða sem við erum búin að koma okkur í í deildinni sem nýliðar.

Við ætlum að æfa aðeins í næstu viku og svo tökum við smá hlé, það verður hollt og gott að komast aðeins frá hvor annarri, en við ætlum bara að nýta þetta hlé til þess að hvíla okkur og svo undirbúum við okkur vel fyrir næsta leik á móti FH,“ sagði Óskar

Unnur Dóra: Gott frí og svo keyrum við okkur í gang

Unnur Dóra skoraði annað mark Þróttar með laglegum skalla eftir hornspyrnu. Sóknarleikurinn hjá Þróttum var afar góður og hefðu gestirnir auðveldlega geta skorað nokkur í viðbót.

„Frammistaðan okkar var mjög góð og við áttum inni eftir síðustu tvær frammistöður. Við byrjuðum af krafti og fyrri hálfleikurinn var geggjaður en við dettum niður óþarfa mikið í seinni hálfleik en það var gott að sigla þessu heim,“ sagði Unnur

Hvernig sérðu fyrir þér að þið nýtið landsleikjahléið?

„Við byrjum á að taka okkur gott frí og svo keyrum við okkur aftur í gang fyrir næsta leik,“ sagði Unnur

Ólafur Kristjánsson: Það kemur í ljós hvort við sækjum fleiri leikmenn

Þróttur átti frábæran fyrri hálfleik þar sem þær voru með yfirburði á öllum þáttum vallarins.

„Fyrri hálfleikurinn var mjög góður og lagði grunninn að sigrinum. Við skorum tvö mörk þar, liðið er ‘’agressíft’’, vinnur seinni bolta, við vinnum návígi og náum að pressa. Síðan fannst mér þetta slakna aðeins í seinni hálfleiknum þannig að það var gott að fá seinni markið. Fram er gott lið og við vissum það að það væri lið sem gefst aldrei upp og þær eiga heiður skilið fyrir leik sinn líka.“

Caroline Murray hefur leikið sinn síðasta leik fyrir liðið og heldur nú til Bandaríkjanna til þess að spila í USL atvinnumannadeildinni. Þróttur sótti þá öflugan framherja frá Bandaríkjunum sem fær tækifæri að spila sinn fyrsta leik eftir landsleikjahléið.

Sérðu fyrir þér að þið sækið fleiri leikmenn í glugganum?

„Það kemur bara í ljós, við þurfum að skoða það. Það var gott að fá Kaylu Rollins inn strax þegar ljóst væri að Caroline Murray væri að fara. Við þurfum bara að setjast aðeins niður og skoða stöðuna á hópnum og sjá hverju við getum púslað.“