Ný tilraunaborhola í undirbúningi á Seltjarnarnesi

Hafinn er undirbúningur við nýja tilraunaborholu við Bygggarðstanga á Seltjarnarnesi og binda menn vonir við að þar sé að finna einu heitustu uppsprettuna á Nesinu. Þetta kemur fram í tilkynningu frá Seltjarnarnesbæ.

Þar segir að Seltjarnarnesbær hafi undanfarið verið að viða að sér stórgrýti, sem bærinn hefur fengið sér að kostnaðarlausu af Lýsislóðinni, og verði það notað til haugsetningar eins og verkefnið krefst.

Lagður hefur verið vegarslóði frá Norðurströndinni af þessum sökum, til að valda sem minnstu raski á náttúrunni á meðan á framkvæmdum stendur.

„Seltjarnarnesbær býr yfir eigin hitaveitu og getur með því móti boðið bæjarbúum þjónustuna fyrir afar sanngjarnt verð. Fyrstu tilraunir við að bora fyrir heitu vatni á Seltjarnarnesi fóru fram árið 1965 og þó grunnt væri borað kom hátt hitastig vatnsins mönnum strax á óvart. Síðan þá hafa fleiri holur verið boraðar. Nú eru vinnsluholurnar alls fjórar, allar norðan megin á Nesinu og borholurnar átta,“ segir jafnframt í tilkynningu frá bænum.