Yfir tuttugu fartölvur á leið til Sambíu

Hin eldhressa Francisca Mwansa í Bónus á Fiskislóð á von á rúmlega tuttugu fartölvum til Sambíu þar sem hún er stödd í vetrarfríi.

Í ljósi sterkra viðbragða við fartölvusöfnun fyrir Fransiscu Mwansa, hina eldhressu afgreiðslukonu í Bónus á Fiskislóð, ákváðu Alda Sigmundsdóttir sem og Ása Jóhanns að safna sem flestum tölvum fyrir fjölskyldu Fransiscu og börn í Sambíu í samvinnu við Tölvulistann.

Yfir 20 fartölvur söfnuðust í heildina sem voru uppfærðar og yfirfarnar af starfsmönnum Tölvulistans. Þeir stækkuðu einnig minnið og hreinsuðu.

Fransisca er stödd núna í vetrarfríi í Sambíu og mun taka við þeim og koma þeim í réttar hendur á sínu heimasvæði. Francisca sagði í samtali við blaðamann Vísis á dögunum hlakka mikið til farar sinnar fjölskyldunnar og að afhenda þeim tölvurnar. Þá fékk Francisca sjálf tölvu að gjöf frá Tölvulistanum sem hún hefur að læra á undanfarna mánuði.

DHL Express á Íslandi bauðst til þess að taka þátt í verkefninu með því að senda tölvurnar án endurgjalds til Zambíu og sjá til þess að koma þeim á leiðarenda til Fransiscu.

„Það er sérstaklega ánægjulegt að Fransisca skuli einmitt vera í Sambíu þegar fartölvurnar koma. Það er mikilvægt að tölvurnar rati í réttar hendur og það er engri betur treystandi en Fransicu að sjá til þess,“ segir Gunnar Jónsson, markaðsstjóri Tölvulistans, í fréttatilkynningu

„Við viljum þakka öllu því góða fólki sem hefur gefið fartölvu í söfnunina um allt land.  Þeirra framlag mun reynast þessum börnum og fjölskyldumeðlimum Fransiscu ómetanlegt. Starfsmenn okkar hafa yfirfarið fartölvurnar og gert þær eins sprækar og kostur er með því að uppfæra, stækka vinnsluminni og endurnýja straumbreyta.“

Gunnar segir rausnarlegt af DHL Express á Íslandi að taka þátt í verkefninu. Um margar tölvur sé að ræða og ferðalagið til Sambíu langt.

„Alda Sigmundsdóttir sem hóf upprunarlega söfnunina fyrir Fransiscu og Ása Jóhanns eiga mikinn heiður skilið fyrir þetta verkefni.  Þær hafa unnið ötullega að undirbúningi þess og samskiptum við tengliði Fransiscu í Zambíu“.

 

Atli Freyr Einarsson, framkvæmdastjóri DHL á Íslandi, segir sanna ánægju að taka þátt í verkefninu.

„Þegar við fréttum af verkefninu vorum við ekki lengi að taka ákvörðun um að taka þátt með einum eða öðrum hætti. Við höfum notað sögu og viðhorf Fransiscu sem dæmi í starfsmannakynningum hjá DHL um afburðarþjónustulund, eins og viðskiptavinir Bónus á Granda þekkja.“