Vonar að Dagur sendi hreinsunarflokk á staðinn

„Ég hef búið í Breiðholtinu síðan 1968 en aldrei séð Móann svona. Mér blöskraði,“ segir Hrönn Jóhannsdóttir íbúí í Vesturbergi í Breiðholti. Hrönn fór í gönguferð í Móunum sem skilja að Bergin í Efra-Breiðholti og Bakkana í Neðra-Breiðholti og brá í brún yfir sóðaskapnum sem mætti henni.

„Ég geng þessa leið mjög oft,“ segir Hrönn sem vakti máls á óþrifnaðinum á Fésbókarsíðu Íbúasamtaka um Betra Breiðholt. Viðbrögðin stóðu ekki á sér og Breiðhyltingar greinilega ósáttir með sóðaskap í hverfi sínu.

Á meðfylgjandi myndum má sjá draslið sem blasti við Hrönn. Allt frá skápum og hjólkoppum yfir í ógrynni af skóm, tóma tölvukassa, sjónvarp og svefnpoka.

„Ég held að þetta sé þýfi, að minnsta kosti þessir tölvukassar og skjárinn. Pottþétt þessir skór líka,“ segir Hrönn og veltir fyrir sér hvort einhver hafi hreiðrað um sig í svefnpokanum. „Það læddist að mér sá grunur.“

Hún vonast til þess að borgaryfirvöld sjái sóma sinn í því að hreinsa Móana. Hafi hún merkt póst inn á Fésbókarsíðunni borgarstjóraefninu Degi B. Eggertssyni í þeim tilgangi.

„Vonandi sér hann sóma sinn í því að senda hreinsunarflokk á staðinn.“

Hrönn segir rosalega mikið um rusl og drasl í Breiðholtinu en þó ekki svona. Þetta sé svolítið mikið. Aðspurð hvort henni finnist Breiðholtið stundum verða útundan þegar komi að hreinsunarstörfum og öðru er hún fljót til svars:

„Við erum útundan. Það er bara svoleiðis, því miður. Ég þekki það af biturri reynslu enda búið hér síðan ég var tveggja ára gömul.“

Hún segir reglulega fara í gönguferðir í Öskjuhlíð og þar sjái hún stundum drasl. Það sé þó ekki í sama magni og þarna auk þess sem það er vanalega fjarlægt um hæl. Hún vonast til að hið sama gildi um ruslið í Breiðholtinu.

Uppfært: Fyrr í kvöld svaraði Dagur B. Eggertsson ummælum Hrannar á síðunni Betra Breiðholt. Þar segir hann starfsfólk á hverfisbækistöðinni í Jafnaseli komið í málið. Í ummælum hans segir einnig að Reykjavíkurborg þurfi að taka sig á í þessum málum eftir niðurskurð síðari ára. Hann þakkar Hrönn ábendinguna og segir hana góða fyrirmynd.