Kona á níræðisaldri var skölluð

Ráðist var á 83 ára gamla konu og var hún skölluð í garði fjölbýlishúss við Njarðargötu um fimmleytið í gær. „Hún var að tala við hund stráks sem býr tveimur stigagöngum við hliðina á henni, þegar hann kemur út rífur í hana og skallar hana,“ segir Gísli Birgir Ólsen.

„Annar strákur reyndi að aðstoða hana, en hann skallaði hann líka.“ Hann segir tvo lögregluþjóna hafa komið á vettvang, en annar þeirra hafi ekki stigið úr bílnum. „Þau tóku niður nafnið á konunni og stráknum sem var líka skallaður og fóru fljótlega eftir það,“ segir Gísli.

Hann segir einnig að margir íbúar hússins hafi orðið vitni að árásinni en árásarmaðurinn hafi flúið af vettvangi á bíl. „Við tókum niður númerið á bílnum og létum lögregluna vita af því. Það er ótrúlegt hvað þau höfðu lítinn áhuga á þessu. Þeir töluðu ekki einu sinni við kærustu stráksins sem var í íbúðinni hans.“

Kærasta gísla er barnabarn konunnar og voru þau í líkamsrækt þegar hún fékk símtal um að einhver hefði ráðist á ömmu hennar.

Konan fékk stóra kúlu á höfuðið og marðist mjög og var í um fimm tíma á spítala segir Gísli. „Þau eru nú öll vön á sjúkrahúsinu, en þetta höfðu þau ekki séð áður. Fyrst héldu allir að hún hefði dottið, en þegar upp kom að hún hefði verið skölluð voru allir mjög hissa.“

Maðurinn sem reyndi að hjálpa konunni fór einnig á spítala.

„Hann hringi svo aftur í lögregluna og fékk þau svör að það væri mjög mikið að gera hjá þeim. Hann mætti koma til þeirra á Hverfisgötu, en ekki væri hægt að senda fólk til hans,“ segir Gísli.

Maðurinn sem réðst á konuna í gær, var handtekinn fyrir utan húsið á fimmta tímanum í nótt. Þá hafði hann brotið rúður í fimm bílum og rispað rúður í einni. Til verksins notaði hann sérstakan neyðarhamar sem ætlaður er til að brjóta rúður og skera öryggisbelti í bílslysum.

Í tilkynningu frá lögreglunni segir að hann hafi gist fangageymslur í nótt og verði yfirheyrður þegar hann verður í ástandi til þess.

Uppfært 14:40

Í tilkynningu frá lögreglu segir að maðurinn hafi, við yfirheyrslu í dag, viðurkennt bæði líkamsárásina og skemmdarverkin.