Mælir með því að taka fylgjuna með heim

Ung kona sem innbyrti fylgju sína eftir barnsburð segir það hafa bjargað sér frá þunglyndi. Hún mælir með því að nýbakaðar mæður taki fylgjurnar með sér heim.

Í Fréttablaðinu fyrir helgi var greint frá því að dæmi væru um að fylgjum væri smyglað útaf fæðingardeild Landspítalans. Ólíkar ástæður geta verið fyrir slíku en nokkuð er um að mæður vilji borða fylgjuna. Hún er þá gerð að dufti og sett í hylki sem hægt er að taka inn.

Elín Ásta Finnsdóttir er átján ára og eignaðist sitt fyrsta barn í janúar. Hún skrifaði í gær færslu á Facebook, þar sem hún lýsir sinni reynslu af því að innbyrða fylgju eftir barnsburð. Elín Ásta glímdi við fæðingarþunglyndi, en hún hafði lesið sér til um að fylgjan gæti dregið úr því. Hún hefur tekið hylkin inn daglega síðan þau voru útbúin og segist finna mikinn mun á sér.

„Ég hafði ekki mikla trú á þessu í fyrstu svo ég var virkilega hissa þegar þetta virkaði svona vel. Ég byrjaði á að taka þrjú hylki þrisvar á dag en það gekk svo vel að ég fór að minnka skammtana. Orkan kom aftur og ég hef verið í góðu jafnvægi, svo ég tali nú ekki um brjóstamjólkina sem varð mun betri“ segir Elín.

Elín vill að gerðar verði rannsóknir um inntöku fylgja hér á landi og segir umræðuna vera litaða af skilningsleysi og fordómum.

„Ég mæli með þessu. Sérstaklega fyrir mæður sem hafa verið að glíma við þunglyndi,“segir hún.

Sjónvarpsfréttina úr kvöldfréttatímanum má sjá eftir rúmar átján mínútur í klippunni að ofan.