Maður yfirheyrður vegna dýraníðs

Einn maður hefur verið yfirheyrður vegna meints dýraníðs á Kirkjulandi í Kjalarnesi fyrr í þessum mánuði.

Rannsókn málsins er enn í fullum gangi, en lögreglu hafa borist nokkrar ábendingar vegna atviks á Kjalarnesi þar sem hryssa fannst með áverka á kynfærum eftir eggvopn.

Ekki hefur tekist að tengja manninn við málið og ekkert bendir til þess að hann hafi verið á staðnum. Lögreglan útilokar ekki að hryssan hafi getað skorið sig öðruvísi, þrátt fyrir að líklegt teljist að hann sé af mannavöldum. RÚV greinir frá.

Lögreglan óskar eftir upplýsingum um mannaferðir við Kirkjuland á Kjalarnesi þann 8. og 9. Mars. Þeir sem þær geta veitt eru beðnir um að hafa samband við lögreglu í síma 444 1000 eða í tölvupósti á abending@lrh.is