Tekur afstöðu gegn stjórnarflokknum

„Já, ég mun greiða atkvæði gegn þessu vegna þess að ég er á Alþingi til að verja ákveðna hagsmuni og hagsmunirnir heita lífskjör Íslendinga,“ segir Vilhjálmur Bjarnason, þingmaður Sjálfstæðisflokksins um þá tillögu á Alþingi um að aðildarumsókn Íslands gagnvart Evrópusambandinu verði dregin til baka. Þessu greinir fréttastofa RÚV frá.

Vilhjálmur er annar tveggja þingmanna Sjálfstæðisflokksins sem var mótfallinn tillögunni. „Ég met þá stöðu á þann veg að ég held að það sé ekki klofningur, en hins vegar er það áhyggjuefni að það er mikið af frjálslyndu fólki sem að hefur skrifað mér og fleirum og sagt að það sé ekki vært í flokknum, en ég bið það fólk um að hugleiða sína stöðu líka,“ segir Vilhjálmur um þann hóp Sjálfstæðismanna sem lýst hafa yfir vonbrigðum sínum yfir því að tillagan sé komin fram.

Vilhjálmur vildi ekki tjá sig um meint svikin loforð stjórnarflokkanna.„Ég ætla ekkert að dæma um það hvort einhver hafi svikið loforð. Ég hugsa bara um sjálfan mig, þar sem ég er nú í stórum minnihluta og ég verð sjálfur bara að standa í mínar lappir.“