Suðurstrandarvegur lítið ekinn

Nýr Suðurstrandavegur á milli Grindavíkur og Þorlákshafnar, sem kostaði um þrjá millljarða króna er mjög lítið notaður en yfir vetrartímann fara þar um 160 bílar á sólarhring en 530 yfir sumartímann.

Suðurstrandarvegurinn var formlega opnaður 21. júní 2012 en vegurinn er 57 km langur frá Grindavík í vestri að Þorlákshöfn í austri en hann liggur um þrjú sveitarfélög, Grindavík, Hafnarfjarðarbæ og Sveitarfélagið Ölfus. Þegar umferðartölur frá Vegagerðinni eru skoðaðar má sjá að vegurinn er lítið notaður en hann kostaði um þrjá milljarða króna.  Meðaltals sólarhringsumferð um veginn vetrarmánuðina 2013 var 162 bílar við Festarfjall og 212 bílar við Selvog og yfir sumartímann voru bílarnir sem fóru um veginn 530 bílar við Festarfjall og 463 bílar við Selvog.

Þeir sem skipuleggja þjónustu við ferðamenn á Suðurlandi hafa áhyggjur af því hvað lítil umferð er um veginn en Davíð Samúelsson er framkvæmdastjóri Markaðsstofu Suðurlands segir að það þurfi að markaðsetja veginn miklu betur fyrir ferðamenn.