Ekkert skipulagt málþóf hjá stjórnarandstöðunni

Leiðtogar stjórnarandstöðuflokkanna hafa ekki í hyggju að beita skipulögðu málþófi þegar þingsályktunartillaga Gunnars Braga Sveinssonar utanríkisráðherra verður rædd í þinginu. Í dag fer fram fyrri umræðan um tillöguna, sem felur í sér að draga aðildarumsókn Íslands í Evrópusambandið til baka.

„Okkur þykir það ekki góð pólitík. En ég tel samt að málið verði mikið rætt. Ég hef fjölmargt að segja um þetta mál og vil nota tækifærið áður en menn taka Evrópusambandsaðild af dágskrá í kannski áratug,“ segir Guðmundur Steingrímsson, formaður Bjartrar framtíðar.

Birgtitta Jónsdóttir, kafteinn Pírata, segir hennar flokk hafa beðið eftir viðbrögðum Bjartrar framtíðar um hugsanlegt málþóf. „Við Píratar ákváðum að taka ekki þátt í skipulögðu málþófi, nema ef Björt framtíð tæki líka þátt. Við fögnum því að Björt framtíð ætli ekki að beita málþófi. Það hefði skotið skökku við ef við hefðum farið í þessar aðgerðir en Björt framtíð ekki, því Evrópusambandsaðildin er þeim mikilvægt,“ útskýrir Birgitta.

Katrín Jakobsdóttir, formaður Vinstri grænna segir þingflokkinn ekki hafa beitt málþófi á þessum þingvetri og reiknar ekki með því að breyting verði á því, þegar þingsályktunartillagan verður rædd í þinginu.

Árni Páll Árnason, formaður Samfylkingarinnar leggur áherslu á að rætt verði um skýrslu Hagfræðistofnunar Háskóla Íslands áfram, en umræða um skýrsluna er einnig á dagskrá þingsins í dag. „Það er full ástæða til að ræða um þessa skýslu, sérstaklega í ljósi þess að menn eru að draga víðtækar og rangar ályktanir af henni,“ segir Árni Páll