Grunaður um átta lögbrot á tveimur dögum

Hæstiréttur staðfesti í dag gæsluvarðhaldsúrskurð Héraðsdóms Reykjavíkur yfir karlmanni sem grunaður er um þrjár líkamsárásir, tvö eignaspjöll, húsbrot, vopnalagabrot og fíkniefnalagabrot á rúmlega tveimur dögum. Fleiri mál er tengjast manninum eru í rannsókn.

Maðurinn hefur ítrekað komist í kast við lögin undanfarin ár. Auk fyrrnefndra mála hefur kærði hlotið marga fangelsisdóma fyrir samskonar brot og nú eru til rannsóknar að því er fram kemur í greinargerð Lögreglustjórans á Suðurnesjum.

Frá árinu 2007 hafi hann fimm sinnum verið dæmdur fyrir líkamsrárásir. Þann 11. apríl 2011 hafi hann lokið afplánun tólf mánaða fangelsisdóms vegna ráns. Þá hafi hann í nóvember sama ár verið dæmdur fyrir frelsissviptingu.

„Auk þessa hafi kærði verið dæmdur fyrir akstur undir áhrifum fíkniefna, akstur sviptur ökuréttindum, þjófnaði, og margsinnis fyrir vörslu fíkniefna,“ segir í greinargerðinni.

Fjölmörg mál eru til rannsóknar þar sem hinn ákærði kemur við sögu. Má þar nefna líkamsárás við skemmtistað þar sem upptaka sýndi hinn grunaða sparka í höfuð liggjandi manns.

Þá hótaði viðkomandi að skjóta mann með loftbyssu við fíkniefnasölu. Leitaði maður á slysadeild vegna skotsárs á höfði.

Helgina 15.-16. febrúar er ákærði meðal annars sakaður um að hafa ýtt konu í gólfið svo hún fékk áverka í andlit, ruðst inn á heimili fólks vopnaður hnífi og stöðvaður við akstur bifreiðar sem hann var ekki skráður eigandi að. Við leit í bílnum fundust fíkniefni auk tónlistarbúnaðar sem grunaði og félagi hans gátu ekki gert grein fyrir.