Vigdís hafnaði fundarbeiðni um veikleika í fjárlögum

Eins og Vísir hefur áður greint hafa skatttekjur af hverjum ferðamanni sem hingað kemur til lands lækkað um 46% frá árinu 2002.

Á sama tíma hefur ferðamönnum fjölgað um 142%.



Tæplega 300 þúsund ferðamenn komu hingað til lands árið 2002 samanborið við 670 þúsund árið 2013 og voru beinar skatttekjur af hverjum ferðamanni á verðlagi ársins 2013 helmingi lægri árið 2012 heldur en árið 2002.



Þetta kom fram í svari fjármálaráðherra við fyrirspurn Oddnýjar Harðardóttur, þingmanns Samfylkingarinnar.

Á fundi fjárlaganefndar í dag var vakið máls á þessu og samkvæmt Oddnýju, sem á sæti í nefndinni, var óskað eftir fundi um þennan „veikleika á tekjuhlið fjárlaga“.

„Hvernig stendur á þessum veikleika í skatttekjunum af svo ört vaxandi atvinnugrein?“ spyr Oddný á Facebook síðu sinni.

Vigdís Hauksdóttir, formaður fjárlaganefndar og þingkona Framsóknarflokksins, hafnaði hins vegar beiðninni.

Oddný Harðardóttir lagði í kjölfarið fram eftirfarandi bókun:

„Undirrituð vil með þessari bókun mótmæla því harðlega að ósk um fund um veikleika á tekjuhlið fjárlaga hafi verið hafnað af formanni nefndarinnar. Fjárlaganefnd á að hafa eftirlit bæði með tekju- og gjaldahlið fjárlaga og því mótmælir undirrituð því að formaður vilji ekki rækja það hlutverk nefndarinnar og hafni fundarbeiðni er það varðar.“

Ekki náðist í Vigdísi Hauksdóttur við gerð þessarar fréttar.