Ódýrustu grímubúningarnir kosta þúsundkall

Grímubúningar fyrir börn kosta frá um eitt þúsund krónum og upp í tíu þúsund, samkvæmt athugun Fréttablaðsins á verði búninga í nokkrum verslunum. Ódýrustu vörurnar geta verið nokkurra ára gamlar en hægt er að kaupa nýjar á undir tvö þúsund krónum. Í flestum tilvikum er ódýrara að kaupa búninga en leigja þá.

Partýbúðin selur ódýrustu búningana, samkvæmt athugun blaðsins, á 990 krónur.

„Það eru eldri búningar sem eru búnir að vera hjá okkur í einhvern tíma og við bjóðum þá sem valmöguleika fyrir fólk,“ segir Jón Gunnar Bergs, eigandi verslunarinnar, og bætir því við að flestir búningarnir kosti frá 2.990 krónum til 4.990.

„Flestir búningarnir eru bara í einni stærð og miðast þá við þann aldurshóp sem þeir ættu að höfða til,“ segir Jón Gunnar.

Einar Arnarsson, eigandi verslunarinnar Hókus Pókus á Laugavegi, selur búninga frá um tvö þúsund krónum og upp í tíu þúsund.

„Ég myndi segja að flestir búningarnir séu að fara á bilinu tvö til sex þúsund og svo er oft aukakostnaður ef fólk vill bæta við hárkollum eða öðrum fylgihlutum. Vinsælasti búningurinn hjá stelpum heitir Monster High og hjá strákunum er þetta voða blandað. Þeir vilja vera ninjur, Batman eða Súperman,“ segir Einar.

Í Hagkaup er hægt að fá búninga frá 1.699 krónum til 4.990.

„Monster High eru vinsælastir og svo eru Íþróttaálfurinn og Latibær alltaf vinsæl á meðal yngri krakkanna. En verðið hjá okkur hefur ekki hækkað milli ára,“ segir Gunnar Ingi Sigurðsson, framkvæmdastjóri Hagkaups.

Þeir sem eru í grímubúningaleit geta einnig haft samband við búningaleigur. Auður Þórisdóttir, kjólameistari og eigandi Saum­sprettunnar, leigir barnabúninga á átta þúsund krónur en endurgreiðir viðskiptavinum fjögur þúsund þegar búningunum er skilað.

„Flestir sem koma hingað eru að leita sér að búningum fyrir sérstök tilefni eins og partí og afmæli en ekki fyrir öskudaginn enda kostar í rauninni meira að leigja grímubúninga en kaupa,“ segir Auður.