"So Everything. Svo allt, virðulegi forseti“

Þingmenn stjórnarandstöðunnar óskuðu í gærkvöldi eftir því að ráðherrarnir Illugi Gunnarsson, Hanna Birna Kristjánsdóttir og Ragnheiður Elín Árnadóttir yrðu viðstödd umræður um störf þingsins í ljósi fréttar á Rúv í gær.

Þar var minnt á loforð þeirra í síðustu kosningabaráttu en öll þrjú höfðu haldið því staðfastlega fram að Evrópumálin yrðu útkljáð á þessu kjörtímabili með þjóðaratkvæðagreiðslu.

Ráðherrarnir mættu ekki í pontu en það Brynjar Níelsson þingmaður Sjálfstæðismanna hélt uppi vörnum fyrir þá:

„Hér er kallað eftir því að ráðherrar komi hér og gefi einhverjar skýringar á breyttri afstöðu sinni. Eru þeir ekki búnir að segja það? Hef ég verið að misskilja þetta eitthvað?

Að þeir hafi metið það þannig, eins og staðan er núna, að það sé ákveðinn ómöguleiki að gera þetta. Að þessi ríkisstjórn sé í einhverri inngöngu í eitthvað samband sem hún vill ekki fara í. Kannski höfðu þeir einhverjar hugmyndir um það fyrir einu ári, einu og hálfu ári síðan.

Ég segi bara eins og menn segja á útlensku: „So what?“ Er ekki afstaða þeirra bara svona núna?

Og Helgi Hrafn Gunnarsson þingmaður Pírata svaraði Brynjari:

Ráðherrarnir sem um ræðir, hæstvirtir innanríkis- og menntamálaráðherra, hafa ekkert verið hér til þess að tala um þetta. Þeir hafa ekkert verið hér til þess að svara spurningum.

Sömuleiðis þá veit ég ekki alveg hvað ég á að segja um ummæli eins og „So what?“ yfir því að það séu svikin loforð um þjóðaratkvæðagreiðslu. Þetta er þjóðinni hjartans mál. Það er ekkert af gamni sínu sem þúsundir koma dag eftir dag og mótmæla fyrir utan Alþingi. Það er ekkert auðvelt að safna saman 33.433 undirskriftum. Þetta er ekkert smámál.

„So what?“ Allt segi ég. „So Everything". Svo allt, virðulegi forseti."