Annað gullið hjá Domrachevu á fjórum dögum | Myndband

Hvít-Rússar áttu tvær konur á palli í 15 km skíðaskotfimi í dag á Vetrarólympíuleikunum í Sotsjí í Rússlandi. Darya Domracheva hafði mikla yfirburði í keppninni og vann sitt annað gull á leikjunum.

Darya Domracheva vann algjöran yfirburðarsigur og það þrátt fyrir að klikka á einu skoti meira en þær tvær sem komu í næstu sætum á eftir henni. Domracheva vann 10 km eltigöngu á þriðjudaginn en hafði orðið í níunda sæti í fyrstu greininni á leikunum.

Domracheva var í miklum ham í blíðunni í dag. Hún kom mínútu og fimmtán sekúndum á undan Svisslendingnum Selina Gasparin í mark en sú svissneska klikkaði ekki á skoti ekki frekar en Hvít-Rússinn Nadezhda Skardino sem fékk bronsið.

Darya Domracheva er 27 ára gömul og vann brons í þessari grein á Ólympíuleikunum í Vancouver fyrir fjórum árum síðan.

Það er hægt að sjá myndband af keppninni hér fyrir ofan.