Viðurkenningar FKA veittar í kvöld

Félag kvenna í atvinnulífinu afhenti sínar árlegu viðurkenningar í Hörpu fyrr í kvöld. Þórdís Lóa Þórhallsdóttir, formaður félagsins, ávarpaði gesti og að því búnu afhenti Ragnheiður Elín Árnadóttir, iðnaðar- og viðskiptaráðherra, þrjár viðurkenningar.

Liv Bergþórsdóttir, forstjóri Nova, hlaut FKA viðurkenninguna fyrir árið 2014, en undir hennar stjórn hlaut símafyrirtækið hæstu einkunn allra fyrirtækja á Íslandi hjá Íslensku ánægjuvoginni í fyrra, þriðja árið í röð. Hún tók einnig við viðurkenningu sem Markaðsmaður ársins 2012. Hún situr í stjórn CCP og 66 Norður, ásamt því að gegna stjórnarformennsku hjá Wow Air.

Rakel Sölvadóttir, tölvunarfræðingur og stofnandi félagsins Skema, hlaut hvatningarviðurkenningu FKA að þessu sinni. Skema, eða reKode eins og það kallar sig erlendis, kennir ungu fólki að forrita. Félagið hefur haldið fjölda námskeiða fyrir börn á aldrinum 6-16 ára og hafa rúmlega 2000 börn sótt þessi námskeið. Fyrirtækið hefur þegar hafið útrás til Bandaríkjanna og er nú unnið að opnun fyrsta tækniseturs reKode í borginni Redmond síðar í vor.

Það var svo Guðbjörg Edda Eggertsdóttir, forstjóri Actavis á Íslandi, sem hlaut þakkarviðurkenningu FKA í ár. Guðbjörg var sæmd íslensku fálkaorðunni árið 2012 fyrir framlag sitt til uppbyggingar atvinnulífs á heilbrigðissviði. Hún situr nú í stjórnum Auðar Capital, Íslandsstofu, Viðskiptaráðs Íslands og Össurar samhliða störfum sínum hjá Actavis.