Hundraðasti sigurleikur Rúnars sem þjálfari KR

Rúnar Kristinsson, þjálfari Íslandsmeistara KR í fótboltanum, fagnaði í gær sínum hundraðasta sigri sem þjálfari KR-liðsins þegar liðið vann 3-2 sigur á Fram í Reykjavíkurmótinu í fótbolta en þetta kemur fram á heimasíðu KR.

Rúnar var að ná þessum hundraðasta sigri í leik númer 155 en liðið hefur aðeins tapað 36 sinnum undir hans stjórn. KR hefur ennfremur gert 19 jafntefli í þjálfaratíð Rúnars.

Sigrarnir hundrað hafa komið í Pepsi-deildinni (48), í Lengjubikarnum (21), í Bikarkeppninni (14), á Reykjavíkurmótinu (12) og þá hefur KR-liðið unnið fimm Evrópuleiki undir stjórn Rúnars. Markatalan er 346-199 KR í hag.

KR hefur unnið stóra titla fyrstu þrjú fullu tímabil Rúnars með liðið og alls hafa KR-ingar unnið sex mót eða keppnir undir hans stjórn.

Titlar KR undir stjórn Rúnars Kristinssonar:

Íslandsmeistari 2 (2011, 2013)

Bikarmeistari: 2 (2011, 2012)

Deildabikarmeistari: 1 (2012)

Reykjavíkurmeistari: 0 (3 silfur)

Meistarar meistaranna: 1 (2012)