Tillögur verðtryggingarnefndar bæta ekki hag eins né neins

Gylfi Magnússon prófessor í hagfræði og fyrrverandi ráðherra segir erfitt að sjá að tillögur verðtryggingarnefndar bæti hag eins né neins. Fjallið hafi tekið jóðsótt og fæðst mús. Hann hefur litla trú á því að verðtrygging verði að fullu afnumin eftir tvö ár.

Nefnd forsætisráðherra um afnám verðtryggingar skilaði niðurstöðum sínum í gær, þar sem gert er ráð fyrir verðtryggð jafngreiðslulán til 40 ára verði bönnuð og hámarks lánstími slíkra lána verði 25 ár og slík verðtrygging verði ekki heimiluð á lánum til skemmri tíma en tíu ára. Gylfi Magnússon prófessor í hagfræði og fyrrverandi ráðherra segir þetta ekki breyta miklu.

„Ég á nú mjög mjög bágt með að sjá að það sé nokkuð í þessu sem bætir hag eins né neins. Það helsta í þessu er að skammtíma verðtryggð lán eru bönnuð, þ.e.a.s. að lágmarks lánstíminn er lengdur upp í tíu ár. Það kemur þá fyrst og fremst niður á þeim sem hefðu viljað taka verðtryggð bílalán,“ segir Gylfi.

Það sé erfitt að sjá að þetta breyti hag nokkurs manns. Það megi segja að fjallið hafi tekið jóðsótt og fæðst hafi mús.

„Já, það má eiginlega lýsa því þannig. Þetta er nánast ekkert skref í neina átt,“ segir Gylfi.

Hann telji að margir þeirra sem talað hafi djarflega um afnám verðtryggingarinnar hafi haldið að eitthvað allt annað myndi gerast en tillögur nefndarinnar ganga út á. Þær muni einnig flækja lánamálin í landinu að einhverju leyti.

„Án þess að það bæti neitt, hvorki hag lántakenda né hagstjórn,“ segir Gylfi.

Hefur þú trú á því að seinni hlutinn í tillögunni sem gengur út á það að verðtrygging verði afnumin með öllu upp úr 2016 nái fram að ganga?

„Nei, það finnst mér afar ólíklegt. Það þarf eitthvað róttækt að gerast til að það verði niðurstaðan. Væntanlega verður verðtryggingin aldrei afnumin að fullu en hún verður vonandi einhvern tíma orðin ónauðsynleg vegna þess að við höfum náð þeim stöðugleika sem þarf til þess að óverðtryggð langtímalán verði raunhæfur kostur,“ sagði Gylfi Magnússon.