Árni Sigfússon aftur í framboð í Reykjanesbæ

Árni Sigfússon, bæjarstjóri í Reykjanesbæ, gefur kost á sér í framboð vegna bæjarstjórnarkosninga í Reykjanesbæ næsta vor. Þetta kemur fram í frétt Víkurfrétta en Árni skrifaði íbúum í Reykjanesbæ og vinum sínum á Facebook yfirlýsingu vegna þessa.

„Niðurstaðan er að ég er reiðubúinn að fylgja verkum eftir næsta kjörtímabil, fái ég stuðning til. Ég er hlaðinn orku til góðra verka,“ segir Árni í yfirlýsingunni.

Áramót séu góður tími til að líta yfir farinn veg, meta árangur og horfa fram á við. Það eigi við hann eins og aðra. Ekki síst þar sem á miðju nýju ári séu bæjarstjórnarkosningar og menn undurbúa nú val á framboðslista.

Mikilvægt hafi verið að spyrja sjálfan sig hvort hann væri enn reiðubúinn og umhverfið hvort það teldi kominn tími á breytingar.

„Það er slæmt þegar stjórnmálamaður þekkir ekki sinn vitjunartíma. Ég vildi fara yfir leiðarljós mín sem einn af leiðtogunum í okkar samfélagi. Þau byggja á að hafa þekkingu á viðfangsefninu, hafa skýra sýn á framtíðina og kunna að vísa leiðina þangað,“ skrifar Árni.

Niðurstaða Árna eftir að hafa farið vel yfir málið að hans sögn er að hann sé reiðubúinn að fylgja verkum eftir næsta kjörtímabil, fái hann stuðning til.