Trúlofaðist eftir tveggja mánaða samband

„Ég var beðin um að leika í Áramótaskaupinu núna í atriði þar sem var verið að gera grín að Óla Geir. Ég gerði líka létt grín að sjálfri mér í leiðinni. Leikstjóranum leist svo vel á mig að ég var beðin um að leika í fleiri atriðum og allt í allt urðu þau fimm. Í einu atriðinu sést bara í lappirnar mínar þannig að þau voru misstór hlutverkin,“ segir hárgreiðslukonan Arna Bára Karlsdóttir en hún lék líka í Áramótaskaupinu í fyrra. Nafnið hennar gleymist þó í lista yfir leikara sem birtist í lok Skaupsins.

„Mitt nafn gleymdist. Auðvitað leitaði ég að nafninu mínu í listanum en það þýðir ekkert að vera sár yfir þessu. Það var gaman að taka þátt og ég vona að ég fái tækifæri til þess aftur.“

Árið var mjög viðburðaríkt hjá Örnu.

„Þetta var geggjað ár. Ég var mikið í útlöndum og byrjaði strax í janúar á að fara til Boston, Los Angeles og Washington. Í maí fór ég síðan til New York, Philadelphiu, New Jersey og Miami. Í janúar fór ég í myndatöku hjá Playboy. Playboy borgaði allt nema flugið til New York þannig að ég var með söfnun svo ég kæmist út. Mér var gefinn svo mikill peningur þannig að mamma mín og systir gátu komið með mér út. Ég og systir mín erum báðar með börn á sama aldri þannig að við náðum að eyða fimm dögum saman í Boston að leika okkur og versla,“ segir Arna en það var eftirminnileg lífsreynsla að fara í myndatöku hjá Playboy.

„Ég gisti á hóteli í Beverly Hills í risa svítu. Ég mátti panta allt sem ég vildi í boði Playboy þannig að ég tók nett Home Alone-atriði þar sem ég missti mig aðeins. Ég fór líka í Playboy Mansion og á alls konar fundi. Það var mjög sérstakt að vera í Bandaríkjunum því þar hlaupa allir eftir Playboy-módelum og er litið á þetta sem klassískt og fágað. Hér heima er litið á stelpur sem sitja fyrir í Playboy sem mellur. Þetta eru mjög mismunandi samfélög.“

Myndatakan kom Örnu svo sannarlega á framfæri.

„Playboy póstaði myndaseríu af mér á Facebook-síðu sinni og mynd af mér kom fyrir í smáforriti á þeirra vegum. Myndirnar mínar eiga eftir að birtast á heimasíðunni þeirra en þær verða líklega birtar þar 6. janúar. Þessi myndataka varð til þess að Playboy í fullt af löndum sýndi mér áhuga,“ segir Arna en eitt af áramótaheitunum hennar er einmitt að komast í Playboy-tímarit í einu landi. Ástin blómstraði einnig hjá þessari atorkumiklu konu á árinu 2013.

„Ég kynntist stráknum sem ég er með núna í júlí og við vorum búin að vera saman í tvo mánuði þegar hann bað mín. Við byrjuðum líka að búa en við stefnum á brúðkaup á næstu tveimur árum. Hann langar í stórt brúðkaup en ég væri til í að stinga bara af til Las Vegas.“