Starfsþjálfunin reynist best vinnumarkaðsúrræða

Langflestir þeirra atvinnuleitenda sem nýttu sér starfsþjálfunarúrræði á síðasta ári, eða 85 prósent, voru enn í vinnu þremur mánuðum eftir að úrræðinu lauk.

Þetta er meðal þess sem kemur fram í skriflegu svari Eyglóar Harðardóttur, félags- og húsnæðismálaráðherra, við fyrirspurn Guðlaugs Þórs Þórðarsonar um vinnumarkaðsúrræði.

Alls komu 19.311 inn á atvinnuleysisskrá á síðasta ári og nýtti tæpur helmingur þeirra sér eitthvert af þeim vinnumarkaðsúrræðum sem í boði eru. Þar af fór rúmur helmingur í starfsþjálfun þar sem bætur atvinnuleitanda eru greiddar út til atvinnurekanda í allt að sex mánaða starfsþjálfunartímabil.